Hajni ‘ekspert’ në Prizren, kapet nga kamerat e sigurisë duke vjedhur stoli në pikë të ditës [Video]

Një person është filmuar nga kamerat e sigurisë duke kryer vjedhje në një lokal argjendarie në Prizren.

Në pamjet e siguruara nga Gazeta Blic shihet një burrë rreth moshës së mesme i cili futet në dyqanin e argjendarisë dhe fillon të tregojë interesim në aksesorët që gjendeshin mbi një tavolinë prej xhami.

Derisa shitësja e përqendron vëmendjen në kalkulator për t’i treguar peshën dhe çmimin e produkteve përkatëse, ai e kap momentin që njërin nga aksesorët për qafë ta vendosë në dorën e majtë dhe më pas ta fus në xhep.

E për të mos rënë në sy, ai më pas bëhet kinse po tregon interesim në një prej aksesorëve të tjerë, në po të njëjtin vend.

Edhe pse mundohej me çdo kusht të dukej normal, nga lëvizjet e shumta vërehet stresi në të cilin ndodhej ai pas kryerjes së vjedhjes.

Dëshmitari i cili i ka dërguar pamjet ka treguar se vjedhja është kryer të martën e 17 shtatorit rreth orës 14:00 dhe se rasti është paraqitur në stacionin policor në Prizren.