Në raundin e dytë të zgjedhjeve lokale, kandidati për kryetar të komunës së Qendër nga ZNAM, Miroslav Labudoviç, do të ketë mbështetjen edhe të partnerit koalicionar në pushtet – VLEN.
Sonte, përmes një takimi me banorët lokalë nga lagjet Kalaja dhe Duqanxhik, kjo mbështetje u zyrtarizua.
Në takimin, ku përveç Labudoviçit, mori pjesë edhe kryetari i zgjedhur i komunës së Çairit dhe një nga liderët e VLENDI-së, Izet Mexhiti, si dhe sekretari i përgjithshëm i ZNAM, Goran Minçev, Mexhiti iu bëri thirrje banorëve të këtyre lagjeve, shumica e të cilëve janë me përkatësi etnike shqiptare, që më 2 nëntor, kur do të mbahet raundi i dytë, t’i japin mbështetje maksimale kandidatit për kryetar të komunës nga Lëvizja ZNAM, i mbështetur edhe nga VMRO-DPMNE, Miroslav Labudoviç.
Sipas tij, vetëm në këtë mënyrë mund të shpresojnë për zgjidhje të shpejtë, efikase dhe të plotë të problemeve komunale, të cilat në disa vitet e fundit gjatë mandatit të Goran Gerasimovski nuk u adresuan.
Bëhet fjalë për përmirësimin e kushteve bazë të jetesës dhe ngritjen e një niveli më të lartë të jetës së përditshme të banorëve – iniciativa këto që janë tashmë pjesë e programit të Miroslav Labudoviç.
Kjo është dorë e dytë e mbështetjes midis partnerëve në pushtet – ZNAM dhe VLEN, pas zyrtarizimit të mbështetjes dje edhe për Kumanovë, për kandidatin për kryetar të komunës, Maxim Dimitrievski, në raundin e dytë. Bashkëpunimi i partnerëve në nivel qendror – i cili funksionon me sukses tashmë një vit e gjysmë – po reflektohet edhe në nivel lokal, për të mirën e qytetarëve.