Shefi i NATO-s: Europa rriti shpenzimet për mbrojtjen me 20% në vitin 2025

Sekretari i Përgjithshëm i NATO-s, Mark Rutte, tha se pas samitit të vitit 2025 në Hagë, aleatët “morën një vendim historik për të rritur investimet në mbrojtje në 5% të PBB-së”, duke shënuar “progres të konsiderueshëm” gjatë vitit.

“Për herë të parë, të gjithë aleatët arritën objektivin e rënë dakord në vitin 2014 për të investuar të paktën 2% të PBB-së në mbrojtje,” shtoi ai.

Ai theksoi se “pamë një rritje prej 20% të shpenzimeve për mbrojtjen nga Europa dhe Kanadaja në vitin 2025, krahasuar me 2024”.

“Vazhdimi i këtij trendi thelbësor do të jetë prioritet në vitet që vijnë,” u shpreh ai.

Më tej, Rutte vijoi:

“Për shumë kohë, aleatët europianë dhe Kanadaja kanë qenë tepër të varur nga fuqia ushtarake e SHBA-së. Nuk kemi marrë mjaftueshëm përgjegjësi për sigurinë tonë. Por ka pasur një ndryshim të vërtetë në mentalitet, një njohje kolektive e realitetit të ri të sigurisë. Dhe si europian, jam krenar për atë që po bëjmë.”