Nënshkruhet Marrëveshja e Mbrojtjes Ukrainë-Katar

Katari dhe Ukraina kanë nënshkruar një marrëveshje mbrojtjeje që parashikon bashkëpunim për të luftuar kërcënimet me raketa dhe dronë.

“Marrëveshja parashikon bashkëpunim teknologjik, zhvillimin e investimeve të përbashkëta dhe shkëmbimin e ekspertizës në luftimin e raketave dhe sistemeve ajrore pa pilot”, tha Ministria e Mbrojtjes në një deklaratë të lëshuar gjatë vizitës së Presidentit ukrainas Volodymyr Zelensky në Katar.

Më herët, Zelensky ofroi ekspertizën ukrainase në teknologjinë e dronëve si një mënyrë për të rritur sigurinë në të gjithë botën, sidomos në Gjirin Persik.

“Kjo ka rëndësi sepse siguria energjetike dhe kostoja e jetesës, veçanërisht në Evropë, varet nga nafta, gazi dhe burimet e tjera të tyre, si dhe nga tregjet globale të qëndrueshme”, tha ai në një mesazh video drejtuar Forcës së Përbashkët Ekspedicionare, një aleancë sigurie që mbajti një samit në Helsinki.

“Çelësi nuk është vetëm prodhimi i armëve të reja sidomos dronëve jo vetëm teknologjia, por edhe përvoja reale në përdorimin e tyre, dhe integrimi me radarët, aviacionin dhe sistemet e tjera të mbrojtjes ajrore. Këtë përvojë ne e kemi”, shtoi Zelensky.

Presidenti ukrainas tha se në këmbim do të kërkojë ndihmë për mbrojtjen e Ukrainës kundër pushtimit të vazhdueshëm rus.

“Do të donim që shtetet e Lindjes së Mesme të na jepnin mundësinë të forcohemi. Ata kanë disa raketa mbrojtëse ajrore të cilat ne nuk i kemi mjaftueshëm. Kjo është ajo për të cilën do të donim të arrinim një marrëveshje”, tha ai në një intervistë për gazetën franceze Le Monde.