Arbeloa: E mërkurja do të jetë nata jonë, do të shkojmë në Mynih për të fituar

Pas barazimit të mbrëmshëm 1-1 me Gironan, trajneri i Real Madridit, Alvaro Arbeloa ka folur për ndeshjen e kthimit të çerekfinales së Ligës së Kampionëve, ndaj Bayern Munich.

Spanjolli tha se do të kenë kohë për ta përgatitur ndeshjen dhe se beson që të mërkurën do të jetë nata e tyre dhe do të arrijnë të fitojnë, shkruan IndeksOnline.

“Do të përqendrohemi të mërkurën, duke e ditur se duhet të bëjmë një përpjekje të jashtëzakonshme dhe të përgatitemi për ndeshjen. Do të kemi shumë më tepër kohë sesa në ndeshjen e parë për të analizuar gjithçka që ndodhi në ndeshjen e së martës së kaluar, për të korrigjuar gjërat që nuk i bëmë mirë dhe për të provuar të përmirësojmë dhe përmirësojmë atë që bëmë mirë për të parë se si mund t’i dëmtojmë ata. E dimë që e mërkura është ndeshja jonë dhe jemi të qartë për këtë. E gjithë energjia që kemi duhet të drejtohet drejt asaj ndeshjeje. Duhet të shkojmë në Gjermani të vendosur për të fituar dhe ta lëmë gjithçka në fushë.”, ka deklaruar Arbeloa.

Ai po ashtu tha se futbollistët e realit besojnë në fitore dhe rikthim të rezultatit, që do ti mundësonte kualifikimin në gjysmëfinale.

“Dua që lojtarët e mi të besojnë. Kjo është e gjitha që dua. Jam i bindur se ne të 25-të që do të shkojmë atje do të besojmë se mund të fitojmë dhe të ngrihemi në lartësinë e situatës. Në Mynih, ata janë të bindur se, me avantazhin që kanë dhe duke luajtur në shtëpi, janë favoritë. Por ata do të përballen me fanella të bardha, një stemë të rrumbullakët dhe jam i sigurt se do të bëjmë një luftë të fortë.”, ka shtuar Alvaro Arbeloa.

Kujtojmë që Bayern Munich e ka fituar ndeshjen e parë ndaj Real Madridit, me rezultat 2-1, ndeshje e cila u zhvillua në stadiumin ”Santiago Bernabeu”./IndeksOnline/