Deputeti i LDK-së, Arben Gashi, ka reaguar pas vendimit të fundit të Gjykatës Kushtetuese që vendosi masë të përkohshme, duke ndaluar formimin e Qeverisë deri më 30 shtator. Ai ka akuzuar Lëvizjen Vetëvendosje për bllokim të qëllimshëm të institucioneve të Kosovës.
“Edhe një vendim për masën e sigurisë juridike duke e bllokuar Kuvendin të paktën deri më 30 shtator. Pse po i krijoni këto situata?” – ka pyetur Gashi, duke shtuar se dëmi i shkaktuar është shumëdimensional, transmeton lajmi.net.
Deputeti ka theksuar se Kosova po paguan një kosto të rëndë për këtë ngërç politik: “Cila është kostoja politike, ekonomike, juridike, e sidomos reputacionale që po e paguan Kosova?”
Sipas tij, përgjegjësia për këtë situatë bie drejtpërdrejt mbi partinë në pushtet: “Përgjegjësia bie drejtpërdrejt mbi Vetëvendosjen, e cila për interesa të ngushta partiake po e mban peng funksionimin e institucioneve të vendit.”
Në fund, Gashi kërkoi zgjidhje të menjëhershme: “Kuvendi duhet të zhbllokohet – Kosova ka nevojë për institucione që punojnë, jo për kriza të fabrikuara”.