David Beckham: Fëmijët bëjnë gabime, është pjesë e rritjes

Ish-futbollisti britanik David Beckham ka bërë komentin e tij të parë pasi djali i tij i madh Brooklyn (26) bëri akuza të ashpra kundër tij dhe gruas së tij Victoria, duke thënë se fëmijët “bëjnë gabime” në rrjetet sociale dhe se kjo është pjesë e rritjes.

Duke folur për rrjetin televiziv amerikan CNBC, Beckham tha se ka folur shpesh për ndikimin e mediave sociale, “për arsye të mira dhe të këqija”, duke theksuar se ato mund të jenë të rrezikshme, veçanërisht për të rinjtë.

“Ajo që fëmijët mund të shohin dhe të kenë qasje sot mund të jetë e rrezikshme. Por nga përvoja personale, veçanërisht me fëmijët e mi, është e rëndësishme të përdoren mediat sociale për arsyet e duhura”, tha Beckham.Ai deklaroi se e ka përdorur platformën e tij për punë humanitare, veçanërisht në bashkëpunim me UNICEF-in, duke shtuar se është “mjeti më i mirë për rritjen e ndërgjegjësimit rreth problemeve të fëmijëve në të gjithë botën”.

“Jam përpjekur t’ua përcjell të njëjtën gjë fëmijëve të mi – t’i edukoj. Ata bëjnë gabime, por fëmijëve u lejohet të bëjnë gabime. Kështu mësojnë ata. Këtë po përpiqem t’ua mësoj unë”, tha Beckham.

Ai shtoi se prindërit ndonjëherë duhet t’i lejojnë fëmijët e tyre të bëjnë gabime vetë.

Deklarata erdhi pasi Brooklyn Beckham postoi një deklaratë gjashtëfaqëshe në Instagram, në të cilën ai bëri publikisht akuza për konflikt familjar dhe tha se nuk donte pajtim me prindërit e tij, duke i akuzuar ata se përpiqeshin t’i shkatërronin martesën me modelen Nicola Peltz për vite me radhë.