De Jong rikthehet me asist në fitoren e Barcelonës në derbi

FC Barcelona ka marrë një fitore bindëse në derbin e qytetit ndaj Espanyolit, duke triumfuar 4-1 dhe duke shfrytëzuar gabimin e Real Madridit ndaj Gironas për të thelluar diferencën në krye të tabelës në nëntë pikë, me shtatë ndeshje të mbetura.

Lajmi më pozitiv për katalanasit ishte rikthimi i Frenkie de Jong, i cili u përfshi sërish në skuadër për herë të parë që nga 22 shkurti, pas një dëmtimi në kofshë. Mesfushori holandez u hodh në fushë në minutat e fundit dhe la menjëherë gjurmë me një asist vendimtar.

Barcelona e nisi ndeshjen me kontroll të plotë dhe kaloi në avantazh që në minutën e 9-të, kur Ferran Torres shënoi me kokë pas një goditjeje këndi të Lamine Yamal, ndërsa portieri i Espanyolit nuk reagoi si duhet.

Avantazhi u dyfishua në mesin e pjesës së parë, sërish me Yamal në rolin kryesor, i cili me një pasim të jashtëzakonshëm me pjesën e jashtme të këmbës nxori Ferran Torresin përballë portës. Sulmuesi spanjoll e finalizoi me qetësi për 2-0.

Pas pushimit, Espanyol u shfaq më agresiv dhe arriti të ngushtojë rezultatin me Pol Lozanon, duke rikthyer përkohësisht tensionin në ndeshje. Megjithatë, Barcelona vazhdoi të krijonte raste dhe vetëm pritjet e portierit Joan García mbajtën mysafirët në lojë.

Në fund, katalanasit vulosën fitoren me dy gola të tjerë. Yamal shfrytëzoi një dalje të gabuar të portierit dhe shënoi në portën bosh, ndërsa më pas Frenkie de Jong vonoi me zgjuarsi pasimin dhe gjeti Marcus Rashfordin, i cili finalizoi saktë për 4-1.

Një fitore që jo vetëm forcon Barcelonën në garën për titull, por edhe konfirmon rikthimin e një prej lojtarëve të saj më të rëndësishëm në momentin vendimtar të sezonit.