E dhunoi fizikisht e seksualisht gruan e tij, prokuroria jep detaje për rastin në Pejë

Një burrë në Pejë po dyshohet se ka rrahur dhe ka dhunuar seksualisht gruan e tij.

Ai tashmë është ndaluar për 48 orë për veprën penale “dhunimi” me urdhër të prokurorit të shtetit.

Zëdhënësi i Prokurorisë Themelore në Pejë, Shkodran Nikçi, tha për Gazetën Express se për të pandehurin do të kërkohet sigurimi i prezencës së tij në procedurë penale, ndërsa viktima është e sigurt.

“Brenda afatit ligjor, prokurori i shtetit do të parashtrojë kërkesë për sigurimin e prezencës së të pandehurit në procedurë penale. Kurse, viktima ka marrë tretmanin e duhur pas raportimit të rastit dhe për momentin gjendet në shtëpi të sigurt”.

Për këtë rast sot u deklarua edhe policia në raportin 24-orësh.

“Pejë 22.02.2026 – 22:00. Më 23.02.2026 është arrestuar i dyshuari mashkull kosovar, i cili ka ushtruar dhunë dhe ka dhunuar seksualisht viktimën femër- bashkëshorten e tij. Gjatë kontrollit në shtëpinë e të dyshuarit janë gjetur dhe konfiskuar tri armë zjarri dhe 27 fishekë. Me vendim të prokurorit i dyshuari është dërguar në mbajtje”.