Facebook mbyll opcionin e njohur dhe fshin skanimet e fytyrës së një miliard përdoruesve

Facebook ka njoftuar se ka në plan të mbyllë sistemin e tij të njohjes së fytyrës që ekziston për një dekadë, mes shqetësimeve, hetimeve dhe padive të shumta. Gjigandi i teknologjisë të martën njoftoi se do të fshijë të dhënat e skanimit të fytyrës të më shumë se një miliard përdoruesve më vonë këtë muaj. Vendimi buron nga ‘shqetësimet e shumta për vendin e teknologjisë së njohjes së fytyrës në shoqëri’, shkroi Jerome Pesenti, nënkryetar i inteligjencës artificiale në Meta, e cila është kompania e re mëmë e Facebook.

Platforma e Facebook e shikonte njohjen e fytyrës si një mjet të fuqishëm, por “çdo teknologji e re sjell me vete potencial si për përfitim ashtu edhe për shqetësim, dhe ne duam të gjejmë ekuilibrin e duhur”, shkroi Pesenti në një postim në blog. Njohja e fytyrës u prezantua në vitin 2010 dhe identifikonte automatikisht njerëzit në albumet e fotografive të përdoruesve. Ai gjithashtu ofroi sugjerime për përdoruesit që të ‘etiketojnë’ njerëzit dhe të lidhen me llogaritë përkatëse. Facebook tha se ishte krijuar për të kursyer kohë për përdoruesit e tij. Si rezultat, Facebook grumbulloi një nga koleksionet më të mëdha të fotografive dixhitale në botë. Megjithëse Facebook e përdori softuerin vetëm në platformën e vet dhe nuk ua shiste palëve të treta, mbrojtësit e privatësisë kanë pyetur vazhdimisht se çfarë mund të bënte kompania me të dhënat. Shqetësimet e kritikëve janë përqendruar gjithashtu tek kompanitë fillestare që mund të përdorin fytyrat në rrjetet sociale për të trajnuar softuerin për njohjen e fytyrës. Softueri i njohjes së fytyrës ishte një element në ankesat për privatësi që çuan në Komisionin Federal të Tregtisë që të vendoste një gjobë prej 5 miliardë dollarësh në Facebook si pjesë e një marrëveshjeje të vitit 2019. Më shumë se një e treta e përdoruesve e kanë të aktivizuar njohjen e fytyrës, sipas Facebook.

“Bërja e këtij ndryshimi na kërkonte të peshonim rastet kur njohja e fytyrës mund të jetë e dobishme kundër shqetësimeve në rritje për përdorimin e kësaj teknologjie në tërësi”, tha zëdhënësi i Meta, Jason Grosse, sipas The New York Times. Facebook planifikon të fshijë më shumë se një miliard skanime dixhitale të tipareve të fytyrës deri në dhjetor, por nuk do të heqë qafe softuerin që qëndron pas tij, i quajtur DeepFace. Grosse shtoi se Meta nuk e ka përjashtuar përdorimin e teknologjisë së njohjes së fytyrës në produktet në prodhim.