Dy shqiptarë janë dënuar nga një gjykatë angleze me 10 vite burg, pasi është zbuluar një rast ku janë përfshirë në një trafik droge, vlera e së cilës është vlerësuar 1 milion paund, shkruan Syri.net.

22-vjeçari Resul Rahova u pikas nga policia në Manns Road, Edgware, (Londër), më 1 Gusht, kur së bashku me shqiptarin tjetër Bashkim Gurguri u pa nga policia teksa merrnin nga makina tip “Mazda” e 22-vjeçarit, një çantë të madhe.

Një nga oficerët tentoi t’i ndalonte, por Rahova i dha gaz makinës duke drejtuar mjetin drejt oficerëve të tjerë që ndodheshin pranë trotuarit. Efektivëve u është dashur të largoheshin prej aty për t’iu shmangur goditjes nga makina e shqiptarit.

Ndërkohë, 46-vjeçari Gurguri u ndalua në rrugë, duke mbajtur çantën me 11 pako me kokainë të cilësisë së lartë.

Sipas policisë, nëse do të shitej në rrugës, vlera e sasisë së kokainës së sekuestruar do të ishte 1 milion paund.

Një javë më vonë, policia gjurmoi Rahovën teksa futej në një shtëpi në Twickenham, ku edhe e kanë arrestuar.

Të premten, Rahova është dënuar me 6 vite burg, ndërsa Gurguri u dënua ne 4 vite burg. /Syri.net/

Bashkim Gurguri