Një shpërthim është verifikuar rreth orës 10 të paradites së të enjtes në centralin bërthamor të lokalitetit Flamanville të Francës.
Sipas autoriteteve, nuk ka asnjë rrezik kontaminimi bërthamor. Shpërthimi është verifikuar në sallën e makinerive të centralit atomik ku nuk ka elemente radio-aktive, kanë deklaruar autoritetet.
Grupet e shpëtimit, bashkë me njësitë e zjarrfikësve, kanë nisur një operacion kontrolli në mbarë zonën.
Të dyja strukturat kanë konfirmuar fillimisht verifikimin e një shpërthimi dhe më pas një zjarr që ka rënë në brendësi të centralit, por jashtë zonës nukleare.
Pas alarmit paraprak është konstatuar se nuk ka asnjë rrezik dhe për pasojë alarmi është tërhequr. Nga incidenti u intoksikuan lehtë pesë punonjës, ndërkohë që një reaktor u mbyll si masë mbrojtëse.