“Z. President kur don me e kuptu që ju nuk keni mandat me iu përzi vullnetit të deputetëve, por përkundrazi e keni për detyrë me ju raportu atyre,” tha Haradinaj në një reagim të tij pas thirrjeve të vazhdueshme të Thaçit që të ratifikohet marrëveshja për përcaktimin e vijës kufitare me Malin e Zi, e nënshkruar në Vjenë më 26 gusht 2015.

Thaçi të enjten në një adresim drejt popullit kërkoi që të ratifkohet marrëveshja e demarkacionit me Malin e Zi, duke thënë se në të kundërtën do të minohet e ardhmja evropiane e Kosovës.

Edhe të shtunën nëpërmjet një postimi në Facebook, Presidenti Thaçi tha se demarkacioni duhet të kalojë në Kuvend që Kosova të dalë nga izolimi ndërkombëtar.

Haradinaj në reagim thotë se deputetët do ta kundërshtojnë demarkacionin, ndërsa adresimet e Thaçit i konsideron antikushtetuese.

“Por deputetët e kanë kuptuar se kjo marrëveshje e dëmton Kosovën në territor me mbi 8.8 mijë hektarë dhe si e tillë do kundershtohet nga ata. Kjo që ju po e bëni është antikushtetuese pavarësisht qëllimeve tuja,” vijon reagimi i deputetit të AAK-së Haradinaj.

Marrëveshja për demarkacionin është pikë e rendit të ditës në mbledhjen e 1 shtatorit të Kuvendit të Kosovës. Atë ditë Lëvizja “Vetëvendosje ka paralajmëruar protestë”.