“Humvee” shkatërrohet nga shpërthimi, vriten katër ushtarë izraelitë në Gaza
Katër ushtarë izraelitë u vranë dhe tre të tjerë u plagosën nga shpërthimi i një mjeti plasës në qytetin Rafah në jug të Gazës të enjten në mëngjes, njoftoi ushtria izraelite.
Ushtarët e vrarë u identifikuan nga ushtria si: Omri Chai Ben Moshe, 26 vjeç nga Tzafria; Eran Shelem, 23 vjeç nga Ramat Yohanan; Eitan Avner Ben Itzhak, 22 vjeç nga Har Bracha; dhe Ron Arieli, 20 vjeç nga Hadera, shkruan gazeta “The Times of Israel”.
Vdekja e tyre të enjten e çoi në 469 numrin e përgjithshëm të ushtarëve të vrarë izraelitë gjatë ofensivës tokësore kundër Hamasit në Gaza dhe në operacionet ushtarake përgjatë kufirit me enklavën. Në këtë numër përfshihen edhe dy policë dhe tre kontraktorë civilë të Ministrisë së Mbrojtjes.
Të katër ushtarët e vrarë shërbenin në Batalionin “Dekel” të shkollës së oficerëve “Bahad 1”. Ben Moshe ishte komandant kompanie, ndërsa tre të vrarët e tjerë ishin kadetë.
Sipas një hetimi fillestar të ushtrisë izraelite, incidenti ndodhi gjatë operacioneve në lagjen Jenina të qytetit Rafah rreth orës 9 e 30 minuta të mëngjesit, përderisa një buldozer i blinduar po pastronte një rrugë, ndërsa dy automjete të tipit “Humvee” po lëviznin pas tij.
Njëri nga këto automjete më pas lëvizi anash rrugës, ku u godit nga një mjet shpërthyes. Nga shpërthimi mbetën të vrarë katër ushtarë dhe u plagosën tre të tjerë. Njëri prej tyre ka pësuar lëndime serioze, ndërsa dy lëndime mesatare.
Ushtria ende po zhvillon hetim për të zbuluar se çfarë lloji i pajisjes shpërthyese është përdorur, si është aktivizuar dhe kur ishte vendosur aty.
Në fotografi që po qarkullojnë në rrjete sociale shihen pasojat e shpërthimit dhe automjeti ushtarak i shkatërruar.
Duke folur në një konferencë për gazetarë të enjten në mbrëmje, zëdhënësi i ushtrisë izraelite, Gjeneral Brigade Effie Defrin, tha se forcat izraelite “ende janë duke operuar në lagjen Jenina dhe duke shkatërruar infrastrukturë të terrorit”.
Ai shtoi se “në zonë ka ende infrastrukturë që nuk është shkatërruar dhe forcat tona po punojnë për ta bërë këtë”.