Liga e Kampioneve: Sonte duel i zjarrt, Real Madrid-Manchester City

Ndeshjet e para të fazës së 1/8-s së finales të garës më prestigjioze për klube në botë, UEFA Champions League, do të vazhdojnë sonte në katër stadiume të ndryshme evropiane. Përballje e madhe mes Real Madrid dhe Manchester City, do të zhvillohet në Santiago Bernabéu në orën 21:00.

Takimi i parë i mbrëmjes do të zhvillohet mes Bayer Leverkusen dhe Arsenal. Skuadra gjermane do ta presë ekipin londinez në BayArena, duke synuar një rezultat pozitiv para ndeshjes së kthimit në Londër.

Arsenali, i drejtuar nga trajneri Mikel Arteta, po kalon një sezon shumë të mirë dhe konsiderohet një nga ekipet më konkurruese në Evropë këtë edicion. Kjo ndeshje është planifikuar të fillojë nga ora 18:45.

Ndërkohë, tri përballje të tjera shumë interesante do të zhvillohen duke filluar nga ora 21:00.

Përballja e madhe e mbrëmjes është ajo mes Real Madrid dhe Manchester City, në Santiago Bernabéu Stadium. Këta dy gjigantë të futbollit evropian janë përballur shpesh në vitet e fundit në UEFA Champions League dhe pritet një tjetër duel i fortë mes tyre në luftë për një vend në çerekfinale.

Një nga ndeshjet më tërheqëse të mbrëmjes do të jetë edhe ajo mes Paris Saint-Germain dhe Chelsea në Parc des Princes.

Kampioni francez hyn në këtë përballje me statusin e favoritit, duke qenë në formë shumë të mirë në kampionatin vendas, ndërsa skuadra londineze synon të marrë një rezultat pozitiv në udhëtim për të mbajtur gjallë shpresat për kualifikim para ndeshjes së kthimit në Stamford Bridge.

Ndërkohë, kampioni norvegjez Bodø/Glimt do ta presë Sportingun në stadiumin Aspmyra Stadion, në një përballje ku të dy skuadrat synojnë të bëjnë hapin e parë drejt kualifikimit në fazën tjetër të kompeticionit.

Ndeshjet e kthimit të kësaj faze do të zhvillohen më 17 dhe 18 mars, ku do të vendosen ekipet që do të sigurojnë një vend në çerekfinalet e këtij kompeticioni.