Ndërprerje masive e energjisë elektrike dhe mungesë uji godasin Ukrainën
Incidenti vjen pas fushatës disamujore të Rusisë që ka në shënjestër infrastrukturën kritike të Ukrainës, duke shkaktuar dëme të rënda në sistemin energjetik.
Rrjeti elektrik i Ukrainës po përballet me ndërprerje masive të energjisë të shtunën, pasi një “defekt teknik” shkaktoi dështimin e linjave elektrike mes Moldavisë, Rumanisë dhe Ukrainës, bëri të ditur ministri ukrainas i Energjisë.
“Sot në orën 10:42 (08:42 GMT), ndodhi një defekt teknik që shkaktoi ndërprerjen e njëkohshme të linjës 400 kilovolt mes rrjeteve energjetike të Rumanisë dhe Moldavisë, si dhe të linjës 750 kilovolt mes Ukrainës perëndimore dhe asaj qendrore,” shkroi Denys Shmyhal në Telegram.
Ndërkohë, Ministria e Energjisë konfirmoi se situata emergjente në rrjetin elektrik nuk është shkaktuar nga një sulm kibernetik.
Kompania më e madhe private e energjisë në Ukrainë, DTEK, konfirmoi ndërprerje emergjente të energjisë elektrike në Kiev dhe në zonat përreth gjatë orëve të mëngjesit.
Banorët e Kievit po përballen me ndërprerje të energjisë elektrike, ngrohjes dhe furnizimit me ujë pas incidentit, në kushtet e temperaturave të ngrirjes, raportojnë mediat lokale.
Presidenti Volodymyr Zelenskyy njoftoi se puna për rikthimin e shërbimeve është në vazhdim, duke shtuar se synimi është stabilizimi i situatës sa më shpejt të jetë e mundur.