Nga metalet e rralla te ari e diamantet, cila është pasuria minerale e Groenlandës që SHBA dëshiron

Groenlanda konsiderohet potencialisht e rëndësishme për Shtetet e Bashkuara për shkak të pozicionit të saj strategjik dhe burimeve të pasura minerare. Një studim i vitit 2023 tregoi se 25 nga 34 mineralet e klasifikuara si “lëndë të para kritike” nga Komisioni Europian janë identifikuar në Groenlandë.

Nxjerrja e naftës dhe gazit natyror është e ndaluar në ishull për arsye mjedisore, ndërsa zhvillimi i sektorit minerar pengohet nga burokracia dhe kundërshtimi i komuniteteve indigjene.

Tokat e rralla

Tre nga depozitat më të mëdha minerare të Groenlandës ndodhen në provincën jugore Gardar.

Kompanitë që synojnë të zhvillojnë miniera për nxjerrjen e tokave të rralla përfshijnë Critical Metals Corp, e cila ka blerë depozitën Tanbreez, Energy Transition Minerals, projekti i së cilës në Kvanefjeld (Kuannersuit) është bllokuar për shkak të mosmarrëveshjeve ligjore, si dhe Neo Performance Materials.

Tokat e rralla janë thelbësore për prodhimin e magnetëve të përhershëm, të domosdoshëm për funksionimin e automjeteve elektrike.

Grafit

Raporte të ndryshme flasin për praninë e depozitave të grafitit dhe shkëmbinjve grafitikë në shumë zona të ishullit.

Kompania GreenRoc ka aplikuar për një licencë shfrytëzimi për të zhvilluar një projekt në Amitsoq.

Grafiti natyror përdoret kryesisht në bateritë e automjeteve elektrike dhe në prodhimin e çelikut.

Bakër

Sipas Autoritetit të Burimeve Minerare, interesi për shumicën e depozitave të bakrit mbetet i kufizuar deri tani. Megjithatë, potencial të veçantë paraqesin zonat ende të paeksploruara në verilindje dhe në qendër-lindje të Groenlandës.

Kompania 80 Mile synon të zhvillojë depozitën Disko–Nuussuaq, e cila përmban bakër, nikel, platin dhe kobalt.

Nikel

Gjurmë të shumta të akumulimit të nikelit janë identifikuar në Groenlandë, sipas Autoritetit të Burimeve Minerare. Gjiganti minerar Anglo American mori në vitin 2019 një leje eksplorimi në Groenlandën perëndimore, duke kërkuar, ndër të tjera, depozita nikeli.

Zink

Zinku gjendet kryesisht në veri të ishullit, në një zonë që shtrihet në më shumë se 2.500 kilometra.

Disa kompani kanë tentuar të zhvillojnë projektin e zinkut dhe plumbit në Citronen Fjord, i cili është cilësuar si një nga depozitat më të mëdha të pashfrytëzuara të zinkut në botë.

Ar

Zonat me perspektivën më të madhe për zbulimin e arit ndodhen rreth fjordit Sermiligaarssuk, në pjesën jugore të vendit.

Kompania Amaroq Minerals hapi vitin e kaluar një minierë ari në malin Nalunaq.

Diamante

Edhe pse shumica e diamantëve të vegjël dhe gurët më të mëdhenj janë zbuluar në pjesën perëndimore të ishullit, prania e tyre në rajone të tjera mund të jetë gjithashtu e konsiderueshme.

Mineral hekuri

Depozita të mineralit të hekurit janë identifikuar në disa zona të Groenlandës perëndimore.

Titan dhe vanadium

Depozitat e njohura të titanit dhe vanadiumit ndodhen në pjesët jugperëndimore, lindore dhe jugore të Groenlandës.

Titani përdoret për qëllime tregtare, mjekësore dhe industriale, ndërsa vanadiumi përdoret kryesisht për prodhimin e lidhjeve speciale të çelikut. Përbërja industriale më e rëndësishme e vanadiumit, pentoksidi i vanadiumit, përdoret si katalizator në prodhimin e acidit sulfurik.

Tungsten

Tungsteni, i përdorur gjerësisht në aplikime industriale, gjendet kryesisht në pjesën qendër-lindore dhe verilindore të Groenlandës, me depozita gjithashtu në jug dhe në perëndim.

Uran

Në vitin 2021, partia në pushtet Inuit Ataqatigiit ndaloi nxjerrjen e uraniumit, duke ndalur në praktikë zhvillimin e minierës Kuannersuit, e cila prodhonte uranium si nënprodukt.