Prokuroria Publike njoftoi se ka ngritur kallëzime penale kundër Sabahadin Rustemit dhe Aki Saitit për rrezikim të mjedisit dhe natyrës sipas nenit 230, paragrafi 1 të Kodit Penal, që parashikon dënim me burg nga 1 deri në 10 vjet, shrkuan Tela, transmeton FaktiDitor.info
Të dy të dyshuarit, njëri drejtor dhe tjetri menaxher i mbeturinave në NP “Higjiena Komunale” – Shkup, akuzohen se kanë vepruar në kundërshtim me Ligjin për Menaxhimin e Mbeturinave dhe me detyrimet e përcaktuara në Programin Operativ për Grumbullimin dhe Transportimin e Mbeturinave Komunale, si dhe në Planin Operativ për Ruajtjen e Pastërtisë Publike në qytet.
Prokuroria thekson se, duke mos mbikëqyrur si duhet mbledhjen dhe transportimin e mbeturinave, si dhe duke menaxhuar në mënyrë të papërshtatshme mbeturinat, dy të dyshuarit kanë mundësuar krijimin e deponive të vogla në hapësira publike dhe pranë kontejnerëve, duke shkaktuar dëme në cilësinë e tokës, ujit dhe ajrit, dhe rrezik për jetën dhe shëndetin e qytetarëve.
Dyshimet janë konfirmuar nga inspektime të jashtëzakonshme të kryera nga inspektorët vendorë të mjedisit, si dhe nga ekspertiza e Institutit të Shëndetit Publik të Maqedonisë mbi ndikimin e mbeturinave në shëndetin publik dhe mundësinë e përhapjes së sëmundjeve infektive.
Prokuroria po kërkon paraburgim për të dy të dyshuarit për shkak të rrezikut që mund të ndikojnë tek dëshmitarët dhe mundësisë së përsëritjes së veprës penale.