Raport i ri: Pastrimi i minave në Gaza do të kërkojë 20 deri 30 vjet

Pastrimi i Gazës nga municionet e pashpërthyera ka të ngjarë të zgjasë midis 20 dhe 30 vjetësh, tha Nick Orr, një ekspert në asgjësimin e pajisjeve shpërthyese.

Orr e përshkroi enklavën si një “fushë të tmerrshme minash”, duke vënë në dukje se një pastrim i plotë nuk do të ndodhë kurrë, pasi pjesa më e madhe e saj është nën tokë.

“Do të mbetet mjaftueshëm për brezat e ardhshëm”, tha Orr.

Ai vuri në dukje se pastrimi i sipërfaqes është i arritshëm brenda një brezi, rreth 20 deri në 30 vjet.

Orr, i cili ka qenë në Gaza disa herë gjatë konfliktit, është pjesë e një ekipi prej shtatë anëtarësh që do të fillojë javën e ardhshme identifikimin e mbetjeve shpërthyese të luftës në infrastrukturën thelbësore, siç janë spitalet.

Ai paralajmëroi se deri më tani, grupet humanitare si e tija nuk kanë marrë lejen e përgjithshme izraelite për të filluar punën për heqjen dhe shkatërrimin e municioneve, as për të importuar pajisjet e nevojshme.

Armëpushimi i ndërmjetësuar nga SHBA-të ka rritur shpresat se mund të fillojë detyra gjigante e heqjes së minave dhe pajisjeve shpërthyese nga miliona ton rrënoja.