Shpërthen Ban Ki Moon: “Njerëzit pa duar dhe këmbë! Alepo më keq se në thertore”
Sekretari i përgjithshëm i OKB-së Ban Ki Moon ka deklaruar sot se ata që shfrytëzojnë “të gjitha armët destruktive” në Siri kryejnë krime lufte dhe ka paralajmëruar se situata në qytetin Alepo “është më keq se sa në thertore”.
“ Të jemi të qartë. Ata që shfrytëzojnë të gjitha armët destruktive saktë e dinë çka bëjnë. E dinë se bëjnë krime lufte”, ka thënë ai në Këshillin e Sigurimit.
Ban Ki Moon ka dënuar sulmet në dy spitalet më të mëdha në Alepo duke i quajtur krime lufte, transmeton AFP.
“Paramendojeni shkatërrimin. Njerëzit me duar dhe këmbë të këputura. Fëmijët me vuajtje të tmerrshme të cilëve askush nuk u ofron ndihmë. Paramendojeni thertoren. Kjo është e tepërt”, ka thënë sekretari i përgjithshëm i OKB-së