Stuhia e borës shkakton kaos në gjithë Evropën, fluturime, trena dhe tragete të anuluara

Stuhia në të gjithë Evropën po shkakton ende anulimin e linjave të trenave dhe fluturimeve në Holandë, pezullimin e trafikut për automjetet e mallrave në Francë, si dhe tragetet në Greqi, ndërsa në Britaninë e Madhe është në fuqi një paralajmërim i verdhë për borë, si dhe rrezikun e shirave të rrëmbyeshëm, erërave të forta dhe përmbytjeve, raportojnë mediat.

Në aeroportin Schiphol të Amsterdamit sot, katër fluturime hyrëse u anuluan dhe katër u vonuan, që është një situatë shumë më e mirë krahasuar me qindra fluturime të anuluara në ditë, siç ishte rasti në ditët e mëparshme, raporton NL Times.

Transporti hekurudhor në Holandë është prekur gjithashtu, me vonesa të raportuara në disa linja, ndërsa shërbimet midis Maastrichtit dhe Liège janë pezulluar deri nesër në mbrëmje.

Sot në Holandë pritet të bjerë borë, fillimisht në provincat veriore, qendrore dhe lindore, përpara se të shndërrohet gradualisht në shi.

Që nga dje, rreth 700 shoferë kamionësh kanë mbetur të bllokuar në autostradën A36 në verilindje të Francës, drejt kufirit me Gjermaninë, dhe në RN57 në departamentin e Dub dhe Gir, sepse reshjet e dëborës që goditën pjesën lindore të vendit e detyruan prefekturën të ndalojë trafikun e automjeteve mbi 3.5 ton deri nesër, raporton televizioni BFM.

Gjatë natës së kaluar, në autostradën A36 punuan vetëm makinat për pastrimin e borës, dhe automjetet e Kryqit të Kuq mbërritën me furnizime ushqimore për të ndihmuar shoferët e kamionëve gjatë natës.

Tragetet në Greqi rifilluan gradualisht shërbimin sot, pasi erërat e forta u lehtësuan mjaftueshëm për të lejuar nisjet, thanë autoritetet greke, duke theksuar se përmirësimi i kushteve pritej të ishte i shkurtër.

Shumica e linjave të trageteve filluan të operojnë normalisht që nga mëngjesi i sotëm, dhe shumica e tyre u nisën nga porti i Pireut, raporton “Katimerini”.

Zyrtarët dhe operatorët e trageteve u bënë thirrje pasagjerëve të kontrollojnë oraret përpara se të udhëtojnë, duke vënë në dukje se kompanitë mund të anulojnë ende disa itinerare me një njoftim të shkurtër për shkak të kushteve të motit që ndryshojnë me shpejtësi.

Priten reshje dëbore në zonat malore dhe veriore, dhe disa rajone me lartësi më të ulëta në veri të Greqisë janë të kërcënuara, dhe parashikohet një rënie e ndjeshme e temperaturës, veçanërisht në veri të vendit.