Të shtunën vazhdojnë kërkimet për vajzën e zhdukur nga vërshimet (Video)

Katër ditë pas ndërprerjes së kërkimit për gjetjen e foshnjës 16 muajsh, Elif Fejzullahu, e cila rezulton e zhdukur qysh nga mbrëmja e 6 gushtit, nesër policia dhe ushtria përsëri do të jenë në teren, raporton SHENJA.

Gjyshi i vogëlushes, Jusuf Fejzullahu kërkon ndihmë nga të gjithë qytetarët që ti bashkëngjiten aksionit për gjetjen e trupit të saj.

”Në ora 9 nesër do të mblidhemi te stadiumi për ta kërkuar Elifin përsëri. Edhe policia edhe ushtria kanë premtuar se nesër do të vijnë por edhe fshatarët. Pikërisht për këtë e bëj apelin kush ka dëshirë dhe dëshiron të fitoj sevape le të vijë ta kërkojmë dhe një herë ”, ka thënë gjyshi i Elifes, Jusuf Fejzullahu.

Ditë më parë, gjyshit të Elifit qeveria i premtoi se do të kërkoj ndihmë nga Turqia për të sjellë makineri të posatshme për gjetjen e sajë,  por deri më tani aparatet e posaçme nuk kanë arritur.

“Për ndihmën nga Turqia në pritje jemi ende s’ka asgjë , na premtun vetë por nuk kemi asnjë lajm ende”, tha më tej ai.

16 muajshja Elif Fejzullahu rezulton e zhdukur që nga nata e 6 gushtit. Për  herë të fundit ajo është parë në vendin e quajtur Kamnik, aty ku dhe është gjetur e lënduar nëna e saj, ndërkaq 300 -400 metra  më larg është gjetur trupi i pajetë i babait të saj.