Mediat serbe kanë raportuar gjatë ditës se Republika e Madagaskarit e ka tërhequr vendimin e saj për njohjen e Kosovës.
Një gjë e tillë është mohuar nga Ministria e Punëve të Jashtme të Kosovës.
Madje, Fatmir Haxholli, këshilltar i Ministrit të Punëve të Jashtme, Behgjet Pacollit, ka thënë për Klan Kosovën se Pacolli është duke vizituar sot pikërisht Madagaskarin, në kuadër të mini-turneut të tij në kontinentin afrikan.
Ministri i Punëve të Jashtme, sipas Haxollit, po përpiqet të menaxhojë keqpërdorimet e lidhjeve dhe personaliteteve që bën Beogradi.
Sipas tij, Pacolli do të ketë takime me personalitetet më të larta të këtij vendi, duke filluar nga presidenti i Madagaskarit.
“Ministri i Punëve të Jashtme, Behgjet Pacolli, është në vizitë në Madagaskar ku edhe po takon personalitete të larta të këtij vendi, duke filluar nga presidenti i Madagaskarit, për të menaxhuar këtë keqpërdorim të lidhjeve dhe personaliteteve që bën Beogradi në këtë rast dhe raste të tjera”.
“Ministri Pacolli është në një mini-tur në vendet afrikane për t’u marrë me degradimin e fushatës së Serbisë si dhe njëkohësisht për të promovuar forcimin e lidhjeve të Kosovës me vendet afrikane, që për një kohë, në të kaluarën, nuk është se janë kultivuar si duhet”.
Behgjet Pacolli e ka nisur mini turneun e tij në vendet afrikane me Republikën e Gambisë.
Ai ka takuar fillimisht presidentin e këtij shteti, Adama Barrow, për të cilin tha se ka dhënë një mbështetje të fortë për Kosovën dhe integrimin e saj në bashkësinë ndërkombëtare.
Më pas, Pacolli ka takuar edhe Ministrin e Punëve të Jashtme të Gambisë, Mamadou Tangara.
Me këtë të fundit, Pacolli ka nënshkruar tri marrëveshje që do të thellojnë marrëdhëniet politike dhe diplomatike midis Kosovës dhe Gambisë.
