Departamenti për të Mitur në Gjykatën Themelore në Prishtinë ka shpallur këtë të martë aktgjykimin dënues ndaj pesë nga gjashtë të akuzuarit në rastin tronditës të dhunimit të një 11-vjeçareje në Prishtinë.
Trupi gjykues i shpalli fajtorë të akuzuarit B.R., D.Rr., F.S., M.R. dhe M.K., pasi sipas gjykatës, secili prej tyre veçmas ka kryer veprën penale të dhunimit.
Sipas aktgjykimit:
B.R. u dënua me 12 vjet burgim,
D.Rr. me 10 vjet burgim,
B.S. me 10 vjet burgim,
F.S. me 10 vjet burgim,
M.S. me 10 vjet burgim.
Ndërkohë, për të akuzuarin B.S., i cili ndodhet ende në arrati, procedura është veçuar.
Avokatja e viktimës, Kimete Krasniqi, deklaroi për Klan Kosovën se edhe pas rikthimit të rastit në rigjykim, gjykata mori një vendim meritor duke i shpallur përsëri fajtorë të akuzuarit.
“Për pesë nga të akuzuarit për të cilët lënda ishte kthyer në rigjykim, sot u dha vendimi meritor, duke u shpallur sërish fajtorë për veprën që kanë kryer”, tha Krasniqi.
Sipas saj, gjatë procesit janë shqyrtuar të gjitha provat dhe trupi gjykues ka marrë vendimin duke u bazuar në dëshmitë dhe faktet që, sipas saj, dëshmonin qartë fajësinë e të akuzuarve.
Rasti ishte kthyer në rigjykim, pasi avokatët e palëve kishin ankimuar vendimin e Gjykatës Themelore të dhënë në prill të vitit 2024, duke e dërguar çështjen në Gjykatën e Apelit.
Ndërkohë, një nga të akuzuarit, B.S., i cili ishte dënuar me 10 vjet burgim në aktgjykimin e vitit 2024 për veprën penale “Dhunimi”, është arratisur menjëherë pas shpalljes së vendimit dhe ende nuk është kapur nga autoritetet.
Në total, për rastin e dhunimit të 11-vjeçares akuzohen 13 persona, të ndarë në dy procese gjyqësore. Tetë persona akuzohen për ngjarjen e ndodhur në qershor të vitit 2022, ndërsa pesë të tjerë për përfshirje në rastin e dhunimit që dyshohet se ka ndodhur në gusht të po atij viti.