Krimi makaber sot në Palasë, ku një 30 vjeçar me të meta mendore masakroi me thikë kushëririn e tij 12-vjeçar, ka tronditur opinionin publik. Nëse do të bëjmë një kthim prapa në kohë, zbulojmë se numri i vrasjeve nga personat me çrregullime mendore përgjatë viteve të fundit janë të frikshme dhe monstruoze. Përveç vrasjes makabre sot në Vlorë edhe në Dukagjin një i sëmurë mendor plagosi me armë vëllain e tij dhe kunatën, të cilët fatmirësisht janë jashtë rrëzikut për jetën. Krime të tilla, me të drejtë kanë hapur një debat të madh lidhur me trajtimin e këtyre personave që vuajnë nga çrregullimet mendore. Ja disa nga vrasjet më makabre ndër vitë të kryera nga personat e sëmurë mendore përgjatë viteve të fundit.
Berat 2011/I sëmuri mendor vret një 10-vjeçar
Një fëmijë 10-vjeçar ka mbetur i vdekur pasi është goditur nga një person me probleme mendore. Sipas informacionit të policisë së Beratit, ngjarja ka ndodhur në fshatin Donfros të këtij qarku. 10-vjeçari E.A nga Luari i Fierit kishte shkuar tek daja e tij dhe ndërsa po luante me fëmijët, është goditur me sende të forta nga 26-vjeçari Hysen Senka që rezultonte të ishte me kartelë mjekësore për problemet mendore. Fëmija është marrë me shpejtësi nga të afërmit e tij dhe është dërguar në spitalin e Fierit, por për fat të keq nuk ka mundur të mbijetojë. Mjekët e këtij spitali, thanë se ai kishte marrë plagë të renda në kokë dhe në trup. Me herët i sëmuri mendor ishte i shtruar në spital, por ai kishte fituar të drejtën e qëndrimit në familje pas garancisë që kishte dhënë prindërit e tij.
Durrës 2013, i sëmuri mendor vret nënën
Një 51-vjeçar me probleme mendore ka vrarë në vitin 2013 nënën e tij, e vetmja që kujdesej për të pas vdekjes së bashkëshortes një vit më parë. Krimi i rëndë brenda familjes ndodhi në fshatin Kullë të Durrësit pas një debati për motive të dobëta mes Lefter Pashajt dhe nënës së tij Merjeme. Ngjarja ka tronditur veçanërisht fëmijët e fshatit, disa prej të cilëve kanë dëgjuar dhe debatin mes viktimës, nënë e 7 fëmijëve dhe djalit të saj, Lefterit. 51-vjeçari i ka kërkuar të ëmës t’i dorëzonte atij çelësat e shtëpisë, si dhe paratë e pensionit dhe ato pak para që kishte mbledhur nga dërgesat e fëmijëve të tjerë që jetojnë në emigracion. Refuzimi i të moshuarës ka marrë reagimin e dhunshëm të të birit, që e ka goditur me mjete të forta, drutë që viktima përdorte për ngrohje, derisa i ka shkaktuar vdekjen
Vlorë 14 gusht 2013/ Bariu vret një person, plagos një tjetër
Në dukat të Vlorës, në 14 gusht 2013 një bari, vret një person dhe plagos një tjetër. Xhezar Hysa, 45 vjeç nga Mollasi i Elbasani, u deklarua nga policia si person me probleme mendore, i cili kishte marrë trajtim në spital, por ishte lënë më pas i lirë. Vrau, Shedat Vangjeli, 62 vjeç, si dhe plagosi Bexhet Bodaj 59 vjeç.
LAC 2014/ ‘Jam Jezu Krishti’ I sëmuri mendor vret 2 vëllezër
Një i sëmurë mendor vret dy vëllezër brenda në një lokal dhe pasi del jashtë qëllon në mënyrë të pakontrolluar duke plagosur dy kalimtarë të rastit.
Viktima të 27 vjeçarit Altin Piroli, i cili sipas policisë së qarkut të Lezhës ka problem mendore, janë 2 vëllezërit Andrea Cara dhe Endri Cara perkatesisht 27 dhe 30 vjeç, dhe 2 të plagosurit Nikoll Ndoji dhe Tonin Gjini 24 dhe 22 vjeç
Dy vëllezërit ishin pronarë të lokalit ku ndodhi vrasja dhe viktimat ishin shok me 27 vjeçarin. Të tre ishin nga fshati Zhej i rrethit të Kurbinit.
Tiranë 1 prill 2015/I sëmuri mendor vret me kazmë babain
Një 46-vjeçar me të meta mendore, vrau me kazmë babanë e tij 82 vjeç, me të cilin banonte në një shtëpi private në Kinostudio. Policia e Tiranës arrestoi autorin e vrasjes, Simon Prifti, 46 vjeç, Babai i tij, Piro Prifti, 8-2vjeç, kishte denoncuar herë pas here dhunën e ushtruar nga i biri, por nisur nga gjendja e tij mendore, nuk ishte marrë ndonjë masë.
Durrës 14 gusht 2016/ I sëmuri mendor merr peng një 11-vjeçare
Një person me probleme mendore në fshatin Rrashbull të Durrësit kishte rrëmbyer një vajzë 11-vjeçe dhe e mbante në banesën e tij. Policia ka ndërhyrë dhe ka mundur që ta shpëtojë vajzën. Sipas drejtuesve të policisë fatmirësisht ai nuk e ka prekur të miturën. Policia i bëri thirrje autorit i identifikuar si Arben Kabashi, 46 vjeç, që të dorëzohej por ai nuk iu bind urdhërit të Policisë. Pas këtij momenti, në drejtim të Durrësit u nisën nga Tirana forcat RENEA, ndërkohë që personi me çrregullime mendore u mbajt për disa orë i rrethuar në banesë. Ai u vetëdorëzua në momentin kur policia hodhi gaz vetëizolues në banesën ku qëndronte 46-vjeçari. Ai u arrestua më pas nga forcat e policisë.
Redaksia Online
Al.Ç/Shqiptarja.com