Zbulohen planet e Tony Blair për administrimin e Gazës pas përfundimit të luftës
Një dokument prej 21 faqesh i publikuar zbulon një plan për të krijuar një administratë ndërkombëtare kalimtare në Rripin e Gazës pas luftës, të udhëhequr nga ish-kryeministri britanik Tony Blair, si pjesë e një projekti të përgatitur nga një ekip i lidhur me zyrën e tij dhe qarqet amerikano-izraelite pranë administratës së Presidentit të SHBA-së Donald Trump, transmeton FaktiDitor.info
Sipas një raporti nga gazeta izraelite Israel Hayom, plani, i quajtur “Autoriteti Ndërkombëtar Tranzicional i Gazës” (GITA), propozon një administratë të përkohshme që do të zgjasë tre deri në pesë vjet, pas së cilës pushteti do t’i transferohej një “autoriteti reformator palestinez”, detajet e të cilit janë ende të paqarta, raportoi Al Jazeera.
Dokumenti parashikon formimin e një komiteti drejtues ndërkombëtar me 7 deri në 10 anëtarë, të përbërë nga biznesmenë, diplomatë dhe ekspertë ekonomikë, nën kryesinë e Blair me autoritet të plotë në fushat e politikës, sigurisë dhe ekonomisë.
Selia e përkohshme e këtij organi është planifikuar të vendoset në qytetin Arish në provincën egjiptiane të Sinait të Veriut ose në Doha të Katarit.
Përveç Blair, plani përfshin edhe ish-zëvendëskryeministren holandeze Sigrid Kaag si zëvendëspresidente për çështjet humanitare, amerikanin Mark Rowan si president të Fondit të Rindërtimit, egjiptianin Nagb Sawiris për investimet rajonale, si dhe përfaqësuesen izraelito-amerikane Aria Lightstone në krye të Marrëveshjeve të Abrahamit, ndërsa një përfaqësuese palestineze pa kompetenca të vërteta ekzekutive, emri i të cilit nuk është bërë i ditur.
Sipas mediave, ky model tregon se administrata do të jetë nën kontrollin e aktorëve ndërkombëtarë, ndërsa roli palestinez do të jetë kryesisht simbolik.
Plani parashikon gjithashtu emërimin e administratorëve palestinezë “neutralë” që do të menaxhojnë sektorin publik nën mbikëqyrjen e një bordi ndërkombëtar, si dhe krijimin e një organi këshillimor lokal pa kompetenca ekzekutive.
Gjithashtu parashikon krijimin e një “Fondi për Rindërtimin dhe Investimet në Gaza” të financuar nga vendet e Gjirit, investimet perëndimore dhe kreditë ndërkombëtare, me një model fitimi në të cilin kompanitë ndajnë të ardhurat nga projektet e rindërtimit.
Në fushën e sigurisë, dokumenti propozon vendosjen e një force shumëkombëshe nën kujdesin e OKB-së ose SHBA-së, ndalimin e të gjitha grupeve të armatosura palestineze gjatë periudhës së tranzicionit dhe mbikëqyrjen ndërkombëtare të ristrukturimit të forcave palestineze të sigurisë.
Dokumenti konfirmon se organi do të ketë të gjitha pushtetet ekzekutive, legjislative dhe gjyqësore, pa të drejtën e ndonjë pale palestineze për të përmbysur vendimet e tij.
Plani i zbatimit parashikon tre faza – një periudhë përgatitore tremujore, pastaj një fazë fillestare gjashtëmujore të pranisë dhe së fundmi një fazë rindërtimi që do të zgjasë dy deri në tre vjet, përpara se pushteti t’i transferohet gradualisht një “autoriteti palestinez të reformuar”, karakteri i të cilit është ende i paqartë, pohon gazeta izraelite.