Ylli i Juventusit dhe Portugalisë, Cristiano Ronaldo, nuk do të luajë në ndeshjen e Kombëtares së Portugalisë kundër Kombëtares së Italisë më 10 shtator, pasi që dëshiron të stërvitet për Juventusin, raporton La Gazzeta dello Sport.
Raportohet se ish-sulmuesi i Real Madridit ka refuzuar të luajë në ndeshjet kundër Kroacisë dhe Italisë, ndeshjet këto të cilat do të zhvillohen në kuadër të Ligës së Kombeve. Këto ndeshje do të mbahen gjatë pushimit që kanë klubet e futbollit pas ndeshjeve të kësaj jave.
Italia do të përballet me Portugalinë në Lisbonë më 10 shtator, por Cristiano Ronaldo nuk do të jetë në dispozicion për trajnerin Fernando Santos, pasi që dëshiron të vazhdojë të stërvitet për klubin e Juventusit.
Një javë pasi të përfundon pushimi për klubet, “Zonja e vjetër” do të debutojë në Ligën e Kampionëve për këtë sezon dhe Ronaldo dëshiron të jetë 100 përqind në formën e tij më të mirë.
Ronaldo u transferua në Juventus nga Real Madridi këtë verë për 117 milionë euro. Ai e kishte fituar titullin e Ligës së Kampionëve për tri vite radhazi me klubin madrilen dhe tifozët e Juventusit kërkojnë nga ai të bëjë të njëjtën gjë edhe për italianët.
Ronaldo nuk ka arritur ende të shënojë gol për klubin e tij të ri këtë sezon. Në ndeshjet kundër Chievos dhe Lazios, ai nuk arriti të shënojë, megjithatë tifozëve të Juventusit ai u bëri përshtypje me performancën e tij.