Pas raundit të parë të zgjedhjeve presidenciale në Poloni, kryebashkiaku liberal i Varshavës, Rafał Trzaskowski, është përpara sipas sondazheve paszgjedhore. Por sfiduesi i tij nacionalist i krahut të djathtë Karol Nawrocki është pothuajse i barabartë. Të dy duhet të shkojnë në balotazhin e zgjedhjeve më 1 qershor.
Dy javë të tjera luftë për gjithçka ose asgje.
“Lufta për gjithçka” ka nisur, shkroi kryeministri polak Donald Tusk pak pasi u shpallën rezultatet e para të sondazhit paszgjedhor, të ashtuquajturat exit poll, për zgjedhjet presidenciale. “Ka ende shumë punë përpara nesh,” tha kandidati i tij Rafał Trzaskowski në një parti zgjedhore në Sandomierz, Polonia jugore. Kryebashkiaku 53-vjeçar liberal dhe pro-evropian i Varshavës është shpresa e qeverisë së Tusk. Kjo deri më tani është bllokuar shpesh në legjislacion nga presidenti Andrzej Duda, i cili është i afërt me PiS. Pas dy mandatesh në detyrë, ai nuk u lejua më të kandidonte.
Siç pritej, Trzaskowski mori më shumë vota në raundin e parë të votimit. Nuk pritej që kandidati i partisë nacionaliste të djathtë PiS, Karol Nawrocki, ta ndiqte kaq nga afër. Kjo do të thotë se balotazhi i 1 qershorit do të jetë një garë shumë e ngushtë. Një tjetër surprizë e mbrëmjes ishte performanca e përgjithshme shumë e fortë e kandidatëve ekstremistë të djathtë.