Zaev: Barazia gjinore në sport është realitet i cili duhet të ndodhë dhe të ruhet

Barazia gjinore në sport nuk është vetëm mbështetje deklarative, por realitet i cili duhet të ndodhë dhe të ruhet, deklaroi sot kryeministri Zoran Zaev në fjalimin e tij në ngjarjen “Barazia gjinore në sport”.

“Ne si Qeveri e njohim barazinë gjinore si një nga punët kyçe për progres pozitiv shoqëror. Por, arritja e barazisë gjinore në sport do të jetë sukses edhe më i madh për të gjithë ne sepse sporti konsiderohet si sferë ku dominojnë meshkujt dhe është koha që bashkërisht t’i tejkalojmë stereotipet gjinore të cilat mbisundojnë në sport”, theksoi kryeministri.

Ai theksoi se sportistet dhe punonjëset e sportit duhet njësoj të marrin pjesë në të gjitha proceset e sjelljes së vendimeve të cilat do të ndikojnë në zhvillimin e sportit rekreativ dhe të lartë.

“Kemi gra të afta, të mençura dhe të guximshme të cilat bashkë me burrat duhet të kontribuojnë në krijimin e politikave të barabarta në sport”, potencoi Zaevi.

Në këtë ngjarje mori pjesë edhe Silvia Mitevska, këshilltare e kryeministrit për sport. Sipas Mitevskës, përfshirja gjinore është proces i dyanshëm dhe që të tejkalohet pabarazia në sport edhe burrat duhet të përfshihen në mënyrë të barabartë sa edhe gratë.

Naumçe Mojsovski, drejtor i Agjencisë për Rini dhe Sport, sot në paraqitjen e tij në këtë ngjarje, theksoi se investimi në sport dhe në përgjithësi kthimi i sportit aty ku e ka vendin, nënkupton investim në jetë të shëndoshë, cilësore, në ndërtimin e ambasadorëve më të mirë të një shteti.