Deklarata e Pendarovskit, Zaev: Rigjykimi për “27 Prillin” nuk do të thotë amnisti

Gjithkush ka të drejtë të nisë procedurë për kthimin e gjykimit derisa ka dëshmi dhe argumente të reja e që ndikojnë që gjykatësit të marrin vendim të tillë. Assesi falje, assesi amnisti. Ata e kanë të drejtën si të gjithë të tjerët, nëse ka dëshmi dhe momente të reja, le të veprohet. Ashtu ka vlerësuar edhe Presidenti – deklaroi Zoran Zaev, Kryeministër.
Nga BDI thonë se deklarata e presidentit paraqet qëndrimin e tij individual me të cilin nuk pajtohen. Sipas tyre, vendimet gjyqësore duhet mbështetur në dëshmi dhe jo në porosi telefonike.

Pikëpamjet individuale nuk i konsideroj si ndërhyrje në gjyqësor por si koment të proceseve dhe si perspektivë personale të individëve të caktuar. BDI është tërësisht i angazhuar për një vetting në gjyqësorë, prokurori dhe politikë mbi gjitha si dhe marrje të vendimeve duke u mbështetur në sundimin e të drejtës dhe jo në marrjen e vendimeve mbi bazën e porosive telefonike – u shpreh Arbër Ademi, Deputet i BDI-së.
Opozita shqiptare vlerëson se deklarata e Presidentit Pendarovski se mbështet rigjykimin e procesit gjyqësor për 27 prillin nuk i përket një presidenti të një vendi anëtarë i NATO-s dhe se ky president deri tani nuk është deklaruar asnjëherë për rastet e montuara kundër shqiptarëve. Ndërkohë nga VMRO-DPMNE-ja njoftojnë se të premten lideri opozitar Hristijan Mickoski do të takohet me presidentin Pendarovski për të diskutuar modalitetet mbi hapjen e rastit “27 prilli”, epilog gjyqësorë i arritur mbi bazën e akuzës për cenim terrorist të rendit kushtetues.

Adrian Kerimi