Zgjedhjet lokale, një mundësia historike për ndryshimin e pozitës politike të shqiptarëve në Maqedoninë e Veriut!

Zgjedhjet lokale të 19 tetorit përbëjnë një moment kyç për të ardhmen politike të shqiptarëve në Maqedoninë e Veriut. Ato nuk janë thjesht garë për komunat, por një test i vullnetit politik dhe i forcës reale të faktorit shqiptar në vend. Rezultati i këtyre zgjedhjeve do të ndikojë drejtpërdrejt në pozitën e partive shqiptare brenda qeverisë dhe në orientimin strategjik të shtetit.

Prej vitesh, pjesëmarrja në pushtetin qendror nuk ka arritur të sjellë barazinë e plotë politike dhe institucionale që shqiptarët presin. Shpesh, faktori shqiptar ka qenë i nënvlerësuar, i anashkaluar në vendimmarrje dhe i reduktuar në rol dekorativ.
Kjo situatë nuk mund të ndryshojë pa një tregues të qartë të forcës së votës shqiptare, dhe ky tregues vjen vetëm nga një mobilizim maksimal në zgjedhjet lokale.

Përkrahja e Frontit Kombëtar për Integrim në këto zgjedhje përfaqëson jo vetëm një zgjedhje politike, por një strategji kombëtare. Një fitore e fuqishme e tij do të reflektojë qartë vullnetin e shumicës absolute shqiptare, duke krijuar presion real për:

– Ndryshimin e raporteve të pushtetit në favor të partneritetit të barabartë,

– Debllokimin e procesit të integrimit evropian,

– Vendosjen e kohezionit të brendshëm si model i një shteti funksional multietnik dhe me demokraci konsensuale.

Pas 19 tetorit, nëse shumica shqiptare shprehet qartë dhe fuqishëm nëpërmjet votës, situata politike në vend do të ndryshojë rrënjësisht. Faktori shqiptar nuk do të jetë më thjesht pjesëmarrës në pushtet, por vendimmarrës për politikat që përcaktojnë të ardhmen e Maqedonisë së Veriut.

Ky është momenti për të treguar se shqiptarët, të bashkuar rreth një qëllimi të përbashkët, mund të ndikojnë jo vetëm në fatin e komunave të tyre, por edhe në drejtimin strategjik të shtetit.