Ndërron jetë stilisti legjendar italian Giorgio Armani

Stilisti italian i modës dhe pronari miliarder i markës Giorgio Armani ka ndërruar jetë në moshën 91 vjeç, ka raportuar BBC, transmeton Gazeta Express.

Ai ishte arketipi i stilit dhe elegancës italiane, duke riimagjinuar kostumet e meshkujve dhe grave për një audiencë moderne.

Kompania e tij Armani u zgjerua nga moda në një perandori që përfshinte bukurinë, parfumet, muzikën, sportin dhe madje edhe hotelet luksoze, duke sjellë më shumë se 2 miliardë paund në vit.

Donatella Versace i bëri homazh stilistit të ndjerë në faqen e saj në Instagram, duke postuar një fotografi të tij, duke thënë: “Bota humbi një gjigant sot, ai bëri histori dhe do të mbahet mend përgjithmonë”.

Në një deklaratë në faqen e Instagram të markës, thuhet se Armani “punoi deri në ditët e tij të fundit, duke iu përkushtuar kompanisë, koleksioneve dhe shumë projekteve të ardhshme”.

Gjithashtu thuhet se ai ishte “i palodhur deri në fund” dhe “i shtyrë nga kurioziteti i pamëshirshëm dhe një vëmendje e thellë ndaj të tashmes dhe njerëzve”.

Stilisti shihej si një pionier në shumë mënyra, duke e ngritur modën e tapetit të kuq në atë që shohim sot.

Ai ishte gjithashtu stilisti i parë që ndaloi modelet nën peshë nga pasarela, pas vdekjes së modeles Ana Carolina Reston në vitin 2006 nga anoreksia nervore.