Do të paguajmë TVSH-në për porositë online përmes “Temu” – Qeveria po heq përjashtimin për dërgesat nën 22 euro

Qeveria i ka paraqitur Parlamentit projekt-amendamentet në Ligjin për Tatimin mbi Vlerën e Shtuar (TVSH), të cilat parashikojnë heqjen e përjashtimit nga pagesa e TVSH-së për produktet që qytetarët porosisin nga jashtë vendit, nëse vlera e tyre totale nuk tejkalon 22 euro, raporton Faktiditor.info

Me ndryshimet e propozuara, të gjitha dërgesat që më parë ishin të përjashtuara nga taksat — nga pjesët e vogla elektrike deri te veshjet dhe aksesorët e modës — do të bëhen më të shtrenjta me 18 përqind, e barabartë me normën aktuale të TVSH-së.

Përjashtimi nga TVSH-ja do të zbatohet vetëm për dërgesat e vogla me vlerë jo-komerciale, të dërguara nga një individ tek një individ, me një vlerë deri në 22 euro. Përjashtimet janë pijet alkoolike, parfumet, duhani dhe produkte të ngjashme, për të cilat nuk do të zbatohet përjashtimi.

Qeveria e shpjegon ndryshimin me rritjen e ndjeshme të blerjeve online përmes platformave ndërkombëtare, ndër të cilat më e popullarizuara është “Temu” kineze, përmes së cilës qytetarët maqedonas porositën 250 ton mallra vetëm në qershor 2025.

Sipas Administratës Doganore, afërsisht 95 mijë kilogramë nga këto dërgesa u trajtuan si dërgesa të vogla pa taksa, ndërsa 150 mijë kilogramët e mbetur iu nënshtruan taksave doganore me vlerë 41.7 milionë denarë.

Me ndryshimet e reja, Qeveria synon të harmonizojë legjislacionin me praktikat evropiane dhe të sigurojë trajtim të barabartë tatimor për të gjitha produktet e importuara në vend.