Marrëdhënia tradicionale transatlantike “ka vdekur”, thotë ish-presidenti i Këshillit Europian
Marrëdhënia tradicionale transatlantike “ka vdekur”, thotë ish-presidenti i Këshillit Europian
Ish-presidenti i Këshillit Europian, Charles Michel, i tha CNN-it se beson që marrëdhënia transatlantike “ashtu siç e kemi njohur për dekada është e vdekur”, dhe se Europa do të duhet ta kalojë një periudhë “përballjeje politike” me SHBA-në, ndërsa riafirmon veten.
“Jemi në një udhëkryq”, i tha Michel CNN-it në Bruksel, përpara një samiti emergjent të liderëve të BE-së që u thirr për të diskutuar kërcënimet e presidentit amerikan Donald Trump ndaj Grenlandës.
Samiti po zhvillohet edhe pasi Trump u tërhoq nga kërcënimet e tij për tarifa ndaj vendeve europiane që kundërshtuan ambiciet e tij për Grenlandën dhe përjashtoi përdorimin e forcës ushtarake dje.
“A duam të jemi vasal, vasal i poshtëruar, përgjithmonë, apo duam të jemi të aftë të jemi zotër të fatit tonë?” tha Michel.
Michel, mandati i të cilit në krye të Këshillit Europian nga viti 2019 deri në nëntor 2024 përkoi me mandatin e parë të Trumpit, tha se beson që udhëheqësit europianë tani kanë nevojë për një qasje të re ndaj presidentit amerikan.
“Në muajt e fundit, ajo që bëmë, sipas mendimit tim, ishte gabim”, tha ai. “Ne zgjodhëm diplomacinë lajkatare. Prandaj vendosëm ta qetësonim Shtëpinë e Bardhë. Dhe cili është efekti? Efekti i vetëm është se ka ushqyer gjithnjë e më shumë ambicie dhe gjithnjë e më shumë përshkallëzim në retorikë.… Nuk funksionon”.
Ai u dha një mesazh udhëheqësve europianë, duke thënë: “Jini të fortë, jini të guximshëm. Dhe ka një mesazh të qartë që duhet t’ia drejtojmë Shtëpisë së Bardhë: Mjaft, dhe ne jemi gati t’i përdorim mjetet që kemi në dispozicion. Ne kemi shumë mjete, dhe tani është koha të na respektojnë”.