Turqia ka parë një rritje të ndjeshme të pranisë së saj ushtarake globale, duke u pozicionuar si vendi i dytë në botë për nga numri i bazave ushtarake të huaja, menjëherë pas Shteteve të Bashkuara. Sipas të dhënave në dispozicion, Ankaraja ka gjithsej 133 baza jashtë territorit të saj, ndërsa Shtetet e Bashkuara vazhdojnë të dominojnë me deri në 887,raporton Faktiditor.info
Me këtë, Turqia tejkalon fuqitë tradicionale ushtarake si Mbretëria e Bashkuar, e cila ka 117 baza, Rusia me 29 dhe India me 20, gjë që tregon një transformim serioz në politikën e saj të jashtme dhe të sigurisë.
Veçanërisht e habitshme është prania turke në Afrikë, ku Ankaraja ka krijuar një rrjet kapacitetesh strategjike ushtarake dhe logjistike në vende si Somalia, Libia dhe Çadi. Ky veprim e pozicionon Turqinë si një aktor sigurie gjithnjë e më me ndikim në kontinent, duke sfiduar drejtpërdrejt ndikimin e Francës, Rusisë dhe vendeve të Gjirit Persik.
Përveç aspektit ushtarak, ky zgjerim mbart edhe implikime të rëndësishme ekonomike dhe politike, me të cilat Turqia forcon profilin dhe ndikimin e saj ndërkombëtar në zhvillimet gjeopolitike globale./Faktiditor.info/