Policia e Kosovës jep detaje rreth aksionit të djeshëm në Ministrinë e Bujqësisë, tregon se çka u sekuestrua

Prokuroria Speciale bashkë me Policinë e Kosovës, dje kanë realizuar një aksion në Ministrinë e Bujqësisë, Agjencinë e Ushqimit dhe Veterinarisë, zyrën e një kompanie private dhe Agjencinë për Zhvillimin e Bujqësisë.

Policia e Kosovës, përmes raportit 24 orësh ka njoftuar se gjatë këtij aksioni, janë sekuestruar pajisje elektronike si kompjuterë e telefona si dhe dokumente të ndryshme, me urdhër të Gjykatës.

“Prishtinë / 19.07.2025 – NN. Më 27.05.2025, bazuar në urdhëresën e Gjykatës Themelore të Prishtinës nga Njësia e Veçantë e Hetimeve, janë kryer kontrolle në Ministrinë e Bujqësisë, Pylltarisë dhe Zhvillimit Rural, Agjencinë e Ushqimit dhe Veterinarisë, zyrën e një kompanie private dhe Agjencinë për Zhvillimin e Bujqësisë. Gjatë kontrollit janë sekuestruar pajisje elektronike (kompjuterë, telefona), si dhe dokumente të ndryshme në përputhje me urdhëresën e Gjykatës. Dy persona meshkuj kosovarë janë intervistuar dhe pas intervistimit në prani të avokatëve me vendim të prokurorit, janë liruar në procedurë të rregullt”, thuhet në raportin e Policisë.

Dje, Prokuroria Speciale ka intervistuar edhe ministrin e Bujqësisë në detyrë, Faton Pecin dhe kryeshefin e AUV-it, Bekim Hoxhën

Të dytë, pas intervistimit janë liruar në procedurë të rregullt.

Ky aksion i Prokurorisë është realizuar pas raportimeve për skandalin për dhënien e tenderit për ndërtimin e fabrikës për mbetje shtazore.

Në lidhje me tenderin për ndërtimin e fabrikës për mbetje shtazore, PDK të hënën ka mbajtur një konferencë për media.

“Ministria e Bujqësisë, nën drejtimin e ministrit Faton Peci, dhe me aprovimin e Kryeministrit Albin Kurti, ka finalizuar një ndër marrëveshjet më të dëmshme dhe skandaloze për interesin publik, dhënien me qira të një impianti publik me vlerë mbi 10 milionë euro për vetëm 30 mijë euro në vit, për një periudhë 20 vjeçare, ndërkohë që kompania përfituese përfiton subvencione mbi 3.2 milionë euro në vit”, tha dje para mediave zyrtari i PDK-së, Naim Ismajli.

Për më tepër, sipas Ismajlit, kompania përfituese është regjistruar vetëm 5 ditë pas shpalljes dhe nuk përmbushë asnjë nga kriteret ligjore për përvojën teknike dhe financiare të kërkuar në dokumentin e njoftimit, si dhe pronari i saj është i lidhur me tri kompani të tjera pa ndonjë përvojë në fushën e përpunimit të nënprodukteve shtazor.

Në mbrojtje të Faton Pecit, dje kanë dal kolegë të tij nga Qeveria si dhe nga partia ku bënë pjesë, Lista Guxo.

Kjo parti, përmes një postimi në Facebook, ka thënë se Prokuroria Speciale po jep shenja se është bërë pjesë e lojërave politike, shkruan lajmi.net.

GUXO përmes këtij reagimi ka thënë se prokurori i rastit, kishte qenë dikur sekretar i forumit rinor të PDK-së në Prizren.

Partia e tij ka lavdëruar dhe ka ngritur lart punën e ministrit Peci duke e konsideruar si ministrin më të suksesshëm të Qeverisë Kurti 2.

“Ministri Peci është simbol i përkushtimit të palëkundur në luftën kundër krimit dhe korrupsionit. Me vendosmëri dhe integritet të lartë, ai ka qenë në vijën e parë të përpjekjeve për pastrimin e institucioneve dhe për rikthimin e besimit qytetar në shtetin e së drejtës. Po ashtu, z. Peci ka qenë zëri dhe veprimi i lirimit të pronave publike të uzurpuara padrejtësisht, duke vepruar pa kompromis ndaj çdo forme të uzurpimit, pa dallime politike apo lidhje të tjera të ndikimit. Nën udhëheqjen e tij, Ministria e Bujqësisë ka përjetuar një ringjallje të vërtetë. Grantet dhe donacionet janë shpërndarë mbi bazën e meritës, duke u orientuar drejt fermerëve dhe bujqve që realisht kontribuojnë në zhvillimin rural dhe ushqimor të vendit. Partia Guxo qëndron fuqishëm përkrah Ministrit Peci dhe dënon çdo përpjekje për njollosjen e figurave të ndershme që punojnë për interesin publik. Këto sulme politike nuk do ta ndalin betejën tonë për një shtet të drejtë dhe të barabartë për të gjithë qytetarët”, thuhet në reagimin e GUXO-s.