Prokuroria Publike e Shkupit edhe më tej po zhvillon hetimet pse ka kryer vetëvrasje Kosta Kërpaç, personi i cili ishte dëshmitari i Prokurorisë Speciale e më pas njëri prej personave të falur nga presidenti i shtetit Gjorge Ivanov.

Sipas përgjigjes nga institucioni i Marko Zvërlevskit, kanë përfunduar thuajse të gjitha ekspertizat. Por edhe më tej, Prokuroria Publike këmbëngul të merr dëshmi nga Specialja e cila pohonte se dëshmitari i tyre Kosta Kërpaç ka qenë nën presion, njofton Alsat-M. Për këtë, nga institucioni i Zvërlevskit kanë dërguar edhe urgjencë deri tek Katica Janeva.

”Është e domosdoshme të theksojmë se nga Prokuroria Publike për ndjekjen e veprave penale të cilat dalin nga ndjekja joligjore e komunikimeve dhe pas urgjencës së përsëritur, nuk është dorëzuar asnjë dëshmi e as informacion tjetër relevant në këtë drejtim”, tha Prokuroria Themelore Publik- Shkup.

Nga Prokuroria Speciale disa herë edhe publikisht deklaruan se nuk kanë ndërmend t’i dorëzojnë dëshmitë për presione që i ka pësuar tanimë i ndjeri. Mundësi të tillë paralajmëruan vetëm pasi Prokuroria Themelore të përfundoj hetimin.