Vitin e kaluar, në Maqedoni u shpenzuan mbi 209 milionë euro në bastore

Vitin e kaluar, qytetarët e Maqedonisë shpenzuan mbi 209 milionë euro (12,86 miliardë denarë) në bastet sportive, sipas të dhënave të Drejtorisë për të Ardhura Publike, të publikuara nga “Bloomberg Adria”. Shuma mesatare e vendosur për një biletë basti ishte 269 denarë.

Në kthim, kompanitë e basteve kanë paguar fitime në vlerë prej 169 milionë euro (10,39 miliardë denarë), që është 40 milionë euro më pak sesa shuma e përgjithshme e vendosur. Fitimi më i madh i paguar në një biletë të vetme ka arritur në gati 68 mijë euro (4,18 milionë denarë).

Vetëm nga tatimi mbi të ardhurat personale, shteti ka arkëtuar mbi 20 milionë euro (1,25 miliardë denarë) nga pagesat e fitimeve nga bastet sportive.

Sipas analizave, vlera e shpenzimeve në bastet sportive ka qenë në rritje të vazhdueshme gjatë viteve të fundit. Në vitin 2022, qytetarët shpenzuan rreth 193 milionë euro, ndërsa në vitin 2021 kjo shumë ishte pak më shumë se 185 milionë euro. Kjo tregon një trend të rritjes së popullaritetit të basteve sportive në vend, si dhe fitime më të mëdha për kompanitë e basteve dhe për shtetin nëpërmjet tatimeve.

Aktualisht në Maqedoni funksionojnë rreth 800 pika bastesh të licencuara dhe organizatorë të lojërave të fatit. Mbikëqyrjen mbi to e kryejnë Komisioni Shtetëror për Lojërat e Fatit dhe Drejtoria për të Ardhura Publike. Sipas DAP, në vitin 2023 janë regjistruar gati 35 milionë bileta bastesh, që tregon për popullaritetin masiv të kësaj forme argëtimi.

Edhe pse bastet sportive përbëjnë një burim të ligjshëm të të ardhurave për buxhetin, ekspertët paralajmërojnë për rrezikun e zhvillimit të varësisë ndaj lojërave të fatit, veçanërisht te të rinjtë. Qeveria, në periudhën e fundit, ka paralajmëruar ndryshime të mundshme në rregullore, me qëllim mbrojtjen më të mirë të kategorive të ndjeshme dhe forcimin e mbikëqyrjes.