Por, sipas anëtarit të Këshillit ekzekutiv të partisë, Antonio Milloshoski, asgjë nuk përjashtohet. Partia më së pari dëshiron të shohë çka është fakt relevant e çka është ekzagjerim politik.

“Nuk është punë e partive politike të bëjnë hetime dhe të gjykojnë për çfarëdo incidenti që ngjanë. Prandaj duhet institucionet kompetente t’i ndërmarrin të gjitha masat dhe veprimet e nevojshme dhe të gjithë të marrin përgjegjësinë sepse të gjithë ne jemi të barabartë para ligjit”, tha Antonio Milloshoski, VMRO-DPMNE.

Të ngjashme ishin përgjigjet e Milloshoskit edhe për pyetjet e tjera nga gazetarët lidhur me këtë temë. Në asnjë moment ai nuk deshi të komentojë ose të mbajë anë në versionet e ofruara nga MPB-ja dhe Dime Spasov, përkatësisht kush është fajtor e kush viktimë.

Ai vetëm kritikoi opozitën se po përpiqet politikisht të përfitojë në llogari të partisë në pushtet. Përderisa pritet zgjidhje institucionale e rastit Dime Spasov, arritën kërkesa të reja për dorëheqje të zyrtarit të qeverisë.

Nga Lidhja Demokratike e Pavle Trajanovit thonë se me ikjen nga vendi i aksidentit, Spasov ka kryer vepër penale. Nga partia FRODEM e Jove Kekenovskit, pyesin, nëse vërtetë Spasov ka ikur nga dikush, e logjikshme do ishte ai vetë të shkojë në polici, e jo të ikë edhe nga policia pasi është ndaluar.