Zëvendëskomandanti i Forcave Tokësore, gjeneral brigade Xhevahir Geci i shoqëruar nga shefi i Shtabit të KFT-së, kolonel Hasan Hoxha priti sot në ambientet e kazermës ,,Adem Jashari “ drejtorin e ri të NALT-it (NATO Advisory and Liaison Team) gjeneral brigade Uwe A. BECKER
Gjeneral Geci i dëshiroi mirëseardhje gjeneralit Becker dhe e njoftoi për rrjedhat dhe aktivitetet që janë zhvilluar në FSK, bashkëpunimin e mirë me këshilltarët e NALT-it, në të gjitha nivelet, të cilët po japin një ndihmesë të madhe në ngritjen e kapaciteteve të FSK-së në të gjitha fushat.
Pas takimit me gjeneralin Geci, u mbajt një prezantim i shkurtër informues nga shefi i Departamentit të Operativës, kolonel Fadil Hoxha për: Historikun e FSK-së; misionin, detyrat, strukturën, kapacitetet e FSK-së, operacionet, trajnimet, ushtrimet, ndihmën e NALT-it etj..
Gjenerali Uwe A. BECKER vazhdoi me një vizitë edhe në Brigadën e Mbështetjes Operacionale (BMO), ku u takua me zëvendëskomandantin e BMO-së kolonel Avdi Rracin, shefin e Shtabit të BMO-së, nënkolonel Sami Hajrullahun dhe stafin e BMO-së, me ç ‘rast gjenerali Becker është njoftuar për aktivitetet, të arriturat dhe sfidat që ka kjo njësi.
Gjenerali Becker u nda i kënaqur nga takimet dhe të arriturat e FSK-së dhe u zotua se do të vazhdojë punën dhe bashkëpunimin me FSK-në, në mbështetje, këshillim dhe ndihmë në të gjitha fushat, së bashku me këshilltarët e tij, në të gjitha nivelet e FSK-së.