Gjykimi ndaj Pjetër Shalës, dëshmitari thotë babai ishte i ‘‘thyer’’ pas kidnapimit të tij

Duke vazhduar deklarimin e tij, dëshmitari i katërt i mbrojtur me kodin 9 në gjykimin ndaj Pjetër Shalës në Dhomat e Specializuara të Kosovës (DhSK) në Hagë, e ka përshkruar si ‘‘të thyer’’ gjendjen e babait të tij pas kidnapimit në vitin 1999.

‘‘Ishte i thym, fizikisht ishte shumë i zymtë, i ranë’’, tha dëshmitari me kodin 9, raporton ‘‘Betimi për Drejtësi’’.

Këtë ai tha se e vërejti pasi që babi i tij kishte qëndruar shumë i qetë dhe gjithmonë në mendime, e që shtoi se kjo gjendje kishte ndikuar dhe rënduar të gjithë familjarët.

Në vazhdim, duke u përgjigjur në pyetjet e mbrojtësit të viktimave, Simon Laws, dëshmitari tha se kur ishte informuar se babai i tij ishte kidnapuar, kishin qenë ditë të vështira për të.

Kurse, përsëri bëri përshkrim të gjendjes së babait të tij, pas incidentit të kidnapimit në Kukës.

‘‘Ishte shumë i ngarkum, ishte gjithmonë në mendime dhe ndonjëherë edhe shikonte e nuk reagonte, atë e kam vërejt, kshtu s’ka qenë përpara’’, shtoi ai.

Po ashtu, përmendi faktin se babai i tij edhe gjumin nuk e kishte pasur në rregull dhe më s’kishte qenë në gjendje të punojë.

Ai tha se për këtë, familja e tij kishte qenë në kushte shumë të vështira ekonomike dhe se ai vetë jashtë vendit kishte punuar 20 orë në ditë për të ndihmuar familjen dhe se i kishte mbështetur me të hyrat e tij deri në vitin 2008.

Në vazhdim, dëshmitari me kodin 9, u përgjigj në pyetjen e avokatit mbrojtës të të akuzuarit Shala, Muhamed Hedi Auini.

Avokati Auni kërkoi nga dëshmitari që të pohojë fillimisht deklarimet e bëra gjatë seancës së sotme.

Dëshmitari u përgjigj me ‘‘po’’, se gjatë seancës së sotme kishte folur për incidentin e vitit 98 dhe se ai nuk kishte qenë në Kosovë kur e kishte mësuar këtë.

Më pas, kur dëshmitari u pyet se a kishte dhënë informacion tjetër lidhur me burimin e informacionit për Pjetër Shalën dhe kohën kur babai i tij e kishte kuptuar për emrin e tij, kur ishte marrë në pyetje nga hetuesit e ZPS-së.

“S’i kam thanë këtu, kam thënë, ai vetë ka thanë’’, tha dëshmitari.

Në momentin kur avokati mbrojtës lexoi pjesë të deklaratës që dëshmitari kishte dhënë para hetuesve të ZPS-së, prokurori Filippo De Minicis reagoi duke kërkuar që dëshmitarit t’i paraqitet e tërë deklarata dhe jo e pjesërishme, pasi sipas tij në pjesë tjera, deklarimet e dëshmitarit përkojnë 100% me deklarimet në seancë.

Në këto rrethana, kryetarja e trupit gjykues Mappie Veldt-Foglia kërkoi nga avokati mbrojtës që të parashtrojë, pyetje por mos të bëjë interpretime para kohës.

Në vazhdim, dëshmitari është pyetur se çfarë informacione kishte marrë për komandant ‘‘Ujkun’’ dhe ai tha se disa bashkë-fshatarë i kishin thënë se ka ardhur nga Kroacia për të luftuar këtu.

Kurse, menjëherë pas pyetjes së avokatit mbrojtës se a e njihni personin me emrin Sali Çeku, shqyrtimi ka kaluar në seancë private.

Ndërkaq më pas, dëshmitari mohoi që babai i tij të ketë përmendur “Shtëpinë e Verdhë”, ‘Mercedesin e verdhë’’, apo t’i kishte treguar për gazetarin/hetuesin me emrin Michael.

Po ashtu, dëshmitari mohoi që babai i tij t’i kishte përmendur dikë me emrin Gani Shehu, kurse në pyetjen se a e njihni dikë me emrin Blerim Isufaj, dëshmitari tha se ‘‘nuk e njoh personalisht’’.

Ndërsa, kur u pyet se çfarë marrëdhënie kishte pasur babai i tij me të, ai u përgjigj ‘‘të mira, kurrë telashe s’kemi pas me të’’.

Tutje, dëshmitari është pyetur nëse ka pasur numër kontakti me punonjës të ZPS-së para se të takohej me ta për të dhënë intervistë, por që shqyrtimi kaloi në seancë private.

Pas kësaj, nga trupi gjykues u konstatua se dëshmitari me kodin 9, ka përfunduar dëshminë e tij dhe se gjykimi për të akuzuarin Shala do të vazhdojë me 1 maj 2023.

Gjykimi ndaj Pjetër Shalës, dëshmitari thotë se babai iu kidnapua dhe u keqtrajtua në vitin 1999 në Shqipëri

(Përditësuar, ora 12:08)- Gjykimi ndaj Pjetër Shalës në Dhomat e Specializuara të Kosovës (DhSK) në Hagë, ka vazhduar me dëgjimin e dëshmitarit të katërt të mbrojtur me kodin 9, i cili deklaroi se babai iu kidnapua dhe u keqtrajtua në Shqipëri.

Këtë deklarim, e bëri duke u përgjigjur pyetjeve të prokurores Eva Wyler, raporton ‘‘Betimi për Drejtësi’’.

Dëshmitari tha se nga babai dhe nëna pasi që ishin kthyer në shtëpi, përmes telefonit e kishin informuar se babai i ishte kidnapuar nga katër persona dhe ishte dërguar në një kamp në Kukës.

Sipas tij, telefonata ishte bërë në muajin maj, qershor por nuk e din datën e saktë.

Dëshmitari tha se gjatë transferimit për në Kukës, babai ishte kërcënuar se do ta vrasin dhe se pas dërgimit në kampin e Kukësit i njëjti ishte trajtuar mizorisht.

‘‘E kanë rrah me shkopa gome, hekuri, druri, ia kanë pre me brisk lëkuren, e kanë rrah deri në alivanosje’’, tha dëshmitari me kodin 9.

Sipas tij, kjo kishte ndodhur disa herë dhe se babai i tij kishte arritur t’i identifikojë tre persona.

Ai përmendi emrin e Pjetër Shalës, Sabit Gecit dhe Xhemshit Krasniqit.

Lidhur me atë se a ishte intervistuar babai i tij në atë kamp, dëshmitari tha se e kanë pyetur shkurt se ‘‘kush janë shpiunat po jo kështu gjatë’’.

Para këtyre deklarimeve, dëshmitari sqaroi edhe një incident të ndodhur në vitin 1998, kur familja e tyre ishte larguar nga fshati sepse disa persona kishin shkuar për ta kërkuar babanë e tyre që ta marrin me vete.

I njëjti tha se për këtë kishte mësuar nga familjarët sepse vetë nuk kishte qenë i pranishëm.

Tutje, deklaroi se babai dhe familjarët nuk i kishin njohur të gjithë njerëzit e pranishëm, por që tha se nëna e kishte njohur dikë me emrin Hamëz e që tha se mbiemrin nuk ia di.

Ndërkaq, tha këta njerëz ishin dërguar nga shtabi i Ushtrisë Çlirimtare të Kosovës (UÇK), në Jabllanicë dhe se babai i tij më vonë e kishte mësuar se Pjetër Shala kishte qenë i pranishëm në shtëpinë e tij ditën kritike, për të cilin tha se vetë i akuzuari ia kishte pohuar.

Në vazhdim, dëshmitari tha se vetë Pjetër Shala i kishte thënë babait të tij se ‘‘pse e ke kërku dikënd tjetër që ta ka gjujt kafen se unë vetë ta kam gju kafen me revole dhe se edhe unë isha atë ditë të shpia, pse nuk dilshe ti’’ .

Lidhur me incidentin e kafenesë, dëshmitari tha se kishte ndodhur në vitin 1996, kurse incidenti i shtëpisë në vitin 1998.

Përfundon dëshminë dëshmitari i tretë i ZPS-së në rastin e Pjetës Shalës

Në Dhomat e Specializuara të Kosovës (DhSK) në Hagë, edhe të enjten po vazhdon gjykimi ndaj Pjetër Hagër, ku e ka përfunduar dëshminë dëshmitari i tretë i mbrojtur i Zyrës së Prokurorit të Specializuar, me kodin 7.

Në këtë seancë, trupi gjykues e pyeti dëshmitarin se për çfarë e kishte fjalën dje kur deklaroi se për djemtë perspektivat nuk ishin njësoj, raporton “Betimi për Drejtësi“.

“Perspektiva, nuk kemi marrëdhënie pune, vëllai i madh ka qenë polic…”, tha dëshmitari, duke thënë se e ka fjalën për perspektivën në Kosovë.

Ai shtoi se nuk i kujtohet për sa kohë punoi vëllai i tij në Polici.

Dëshmitari 7 theksoi se i kishte dalë emri se ishte pranuar në Polici, por më pas ia kishin tërhequr.

Ai thotë se këto kanë mundësi të kenë ndodhur lidhur me ato që i kanë ndodhur babait të tij.

Ndryshe, Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës, raporton “Betimi për Drejtësi”.

Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë. /BetimipërDrejtësi