Pasojat nga vërshimet e 10 ditëve më parë vazhdojnë të marrin jetë njerëzish. Sait Ameti, 88 vjet nga Hasanbegu ka vdekur të shtunën si pasojë e një infeksioni të madh në mushkëri, pasi trupi i tij, natën e përmbytjeve derisa po luftonte të mbetej i gjallë nga dallgët e mëdha të ujit ishte mbushur përplot me ujë të ndotur dhe mbetje kanalizimi.

Djali i Saitit, Gazmend Ameti, për televizionin Alsat ka rrëfyer momentet trishtuese kur babai i tij ishte gjetur në mes të oborrit pothuajse i vdekur.

Nga dita e shtunë në këtë familje është hapur konaku për ngushëllime. Mirëpo, siç rrëfen Gamendi, mërzia në këtë familje është dyfishuar, fillimisht ishin dëmet e mëdha materiale ndërsa tani edhe humbja e kryefamiljarit, njofton alsat.

Brenda shtëpisë së familjes Ameti çdo gjë është e shkatërruar, në shumë pjesë të shtëpisë akoma ka baltë dhe ujë.

Të vetmit që kishin vizituar këtë familje ishin anëtarët e komisionit për vlerësimin e dëmeve.