Një sherr në një familje shqiptare në qytezën Mondovi, në Piemonte të Italisë, ka rrezikuar të kthehet në tragjedi.

Siç raportojnë mediat lokale, mbrëmjen e dy ditëve më parë, efektivë të policisë mësynë në një banesë ku jeton një familje shqiptare, pas një telefonate, shkruan Syri.net.

Kryefamiljari 45-vjeçar, në kulmin e konfliktit, ka rrahur bashkëshorten e tij, një shqiptare 40-vjeçare. Më pas ka ndërhyrë vajza 20-vjeçare e çiftit për t’i ndarë, e më tej karabinierët.

Nga denoncimi i gruas, nga dëshmia e vajzës dhe nga vizitat mjekësore në spital, është konstatuar se 45-vjeçari shqiptar, punëtor në Itali, në një moment gjatë sherrit, i ‘pushtuar’ nga zemërimi, ka tentuar të mbysë me duar gruan e tij.

Gruaja dhe vajza janë mjekuar në spital, pas ngjarjes. 40-vjeçares i është përcaktuar një prognozë shërimi prej 25 ditësh nga mjekët, ndërsa vajzës prej 5 ditë, për lëndimet dhe traumën e pësuar.

Shqiptari, i cili është denoncuar për dhunë në familje dhe lëndime të rënda, është larguar nga shtëpia ku banonte më parë. /Syri.net/