Prokuroria e Prizrenit nis intervistimet për vdekjen e trevjeçares Xheneta Gashi

Drejtori i intervistuar, Bedrija Ejupagiq, ka konfirmuar lajmin, duke thënë se i është përgjigjur ftesës së Prokurorisë, raporton KTV.

Edhe kryeprokurori i Prizrenit, Sylë Hoxha, ka konfirmuar një gjë të tillë, duke thënë se Prokuroria i ka hapur hetimet ndaj tre personave, drejtorë në Komunën e Prizrenit, për të cilët dyshohet se në kuadër të fushëveprimtarisë së tyre nuk kanë ndërmarrë masa mbrojtëse në evitimin e fatkeqësisë që ka ndodhur më datën 6 qershor 2016.

Hoxha ka shtuar se varësisht prej dëshmive dhe provave, hetimet mund të zgjerohen edhe ndaj dikujt tjetër.

Trevjeçarja Xheneta Gashi vdiq më 6 qershor të këtij viti, pas shembjes së një shtëpie të vjetër në rrugën ‘Marin Barleti’ në Prizren.

Pas kësaj tragjedie, shoqëria civile dhe qytetarë të shumtë, me anë të protestave, kishin kërkuar dorëheqjen e kryetarit Ramadan Muja dhe të përgjegjësve të tjerë, mirëpo, deri tash, askush nuk është dënuar dhe askush nuk ka marrë përgjegjësi për humbjen e jetës së Xheneta Gashit.