Kryetari i Komunës së Zubin Potokut, Stevan Vuloviç, ka thënë se liqeni artificial i Gazivodës është një pikë strategjike dhe jashtëzakonisht e rëndësishme për të ardhmen e serbëve në Republikën e Kosovës.
“Pa liqenin e Gazivodës në Kosovë do të mbetnin rreth 700 mijë njerëz pa ujë të pijes në Kosovë” thotë Vuloviç.
Vuloviç shprehet i bindur se Serbia do të arrijë të ruaj Gazivodën dhe Trepçën si prona të saj, duke i cilësuar si pika jashtëzakonisht të rëndësishme.
Sipas tij rëndësinë e Gazivodës e tregon edhe lufta e madhe e Prishtinës për ta pasur nën pronësi të vetën.
Rreth temës së liqenit të Gazivodës ishte bërë zhurmë ditët e para të muajit gusht, kur forca të mëdha të KFOR-it ishin vendosur në afërsi të liqenit.
Kjo kishte nxitur edhe reagimin e ashpër të Beogradit, të cilit e kishin akuzuar Hashim Thaçin se po e përdor praninë e forcave të KFOR-it në hidrocentralin e Gazivodës, për të futur në histori marrëveshjen e energjisë me Serbinë.