Klubi i Milanit del sërish në shitje.
Kuqezinjtë pritet që të ndryshojnë pronar pasi në tavolinën e aksionerëve amerikanë të Elliott Management Corporation ka mbërritur oferta e majme.
Sipas raportimeve të medieve italiane thuhet që Louis Vuitton synon të blejë AC Milan për një shifër që do të ishte rreth 1 miliardë euro.
Mëngjesin e sotëm grupi LVMH (kryesisht pronar i Louis Vuitton, por edhe i Dior, Fendi, Givenchy dhe Sephora) mohuan lajmin. Në komunikimin për media thuhet që pronari, Bernard Arnault, nuk do të ishte i gatshëm të blinte klubin e futbollit në pronësi të fondit Elliott.
Edhe pas këtij reagimi mediat thonë se negociatat midis Arnault dhe Paul Singer (pronar i Elliott) po zhvillohen në fshehtësi të madhe.
Padyshim që nuk është një problem ekonomik, duke pasur parasysh që Arnault aktualisht është njeriu i dytë më i pasur në botë.