Tensionet për Groenlandën – Blerësit në Danimarkë përdorin aplikacione për të bojkotuar produktet amerikane
Njerëzit në Danimarkë po përdorin aplikacione celularë për t’i ndihmuar të bojkotojnë produktet amerikane, në një kundërshtim ndaj komenteve të fundit të Presidentit të SHBA-së, Donald Trump, në lidhje me blerjen e Groenlandës, një territor danez.
Blerësit danezë kanë përdorur dy aplikacione në veçanti për të ndihmuar në identifikimin e mallrave të prodhuara në Amerikë dhe për të sugjeruar alternativa lokale, duke i ngritur këto aplikacione në krye të listave të aplikacioneve në Danimarkë.
Një nga aplikacionet, i quajtur UdenUSA ose NonUSA në anglisht, po ngjitet në top lista dhe aktualisht është aplikacioni më i shkarkuar në vend, pak mbi ChatGPT, në App Store.
Aplikacioni u lejon përdoruesve të skanojnë mallra për të parë vendin e origjinës së tyre. Gjithashtu ndihmon në gjetjen e alternativave nga vende të tjera, përveç Shteteve të Bashkuara dhe i shton ato në një shportë blerjesh.
Zhvilluesit thonë se aplikacioni nuk kishte për qëllim të inkurajonte një bojkot, por t’u jepte konsumatorëve më shumë qartësi në lidhje me blerjet e tyre.
Një tjetër aplikacion popullor është Made O’Meter, i cili aktualisht renditet i pesti në App Store në vendin nordik.
“Varet nga konsumatorët se çfarë duan të bëjnë”, tha Jonas Pipper, një nga zhvilluesit e UdenUSA, për transmetuesin publik të Danimarkës DR Nyheder.
Ekspertët thonë se bojkotet e supermarketeve ka të ngjarë të kenë një ndikim të kufizuar, sepse relativisht pak produkte të prodhuara në Amerikë shiten në dyqanet daneze.
Vetëm rreth 1 përqind e konsumit të ushqimit danez vjen direkt nga Shtetet e Bashkuara, sipas Louise Aggerstrøm Hansen, një ekonomiste private në Danske Bank.
Kjo gjithashtu e bën të vështirë vlerësimin e efektit të vërtetë, të një bojkoti të tillë.
Një mënyrë për të shfryrë zemërimin
Megjithatë, studiuesit thonë se aplikacionet mund t’u japin konsumatorëve ende një ndjenjë të autoritetit.
«Shumë njerëz shikojnë lajmet dhe shohin diçka që nuk u pëlqen dhe zemërohen për të. Në këtë rast, bëhet fjalë për ne dhe Groenlandën», tha për mediat lokale Pelle Guldborg Hansen, një studiues i sjelljes në Universitetin Roskilde.
«Dhe pastaj thjesht do të bësh diçka me zemërimin tënd. Pavarësisht se sa i vogël është», shtoi ai.
Që nga fillimi i janarit, Trump ka përsëritur sugjerimet e mëparshme që SHBA-të duhet të blejnë Groenlandën. Zyrtarë nga Groenlanda, Danimarka dhe SHBA-të kanë zhvilluar takime që atëherë, duke i përshkruar qëndrimet e tyre si “dakord për të mos u pajtuar”.
Javën e kaluar, mijëra njerëz dolën në rrugë në Groenlandë dhe Danimarkë në protesta kundër çdo marrjeje të ishullit Arktik nga SHBA-të./ Euronews.